كار بۆ دامه‌زراندنا جڤاتا بلندا ئێزدیان دهێـته‌ كرن

 

كار بۆ دامه‌زراندنا جڤاتا بلندا ئێزدیان دهێته‌ كرن و كه‌سایه‌تیه‌كێ نێزیك میرێ ئێزدیان زانیاریان ل سه‌ر پێك ئینانا جڤاته‌كا بلند ئێزدیان ئاشكرا دكه‌ت”.

ئه‌ندازیار، خالد نه‌رمۆ، كه‌سایه‌تیه‌كێ ئێزدى نێزیك میرێ ئێزدیان و سه‌رپه‌رشتێ نووژه‌نكرنا په‌رستگه‌ها لالش دیاركر:” درێژەپێدان ب ده‌ستپێشخه‌ریا میر حازم ته‌حسین به‌گ، میرێ ئێزدیان ئاماده‌كارى بۆ كۆمبوونه‌كا به‌رفره‌ھ یێن دهێنه‌ كرن ل سه‌ر بابه‌تى دامه‌زراندنا جڤاته‌كا ئێزدیان بۆ رێڤه‌برنا ئێزدیان هه‌ر چه‌نده‌ ئێزدیان رێڤه‌به‌ریه‌ك یا هه‌یى یان ژى سازیه‌ك وه‌كو جڤاتا روحانیا ئێزدیان و میرێ ئێزدیان هه‌یه‌ لێ پێدڤى دامه‌زراویكرنا ڤان جڤاتا هه‌یه‌ ب تایبه‌ت ژى بۆ ئاریشێن ئێزدیان وه‌كو جڤاك و ئایین د ئاشتیى و ئازادیا ل هه‌رێما كوردستانێ هه‌یى رێ ده‌ته‌ ئێزدیان خۆ رێكبێخن بشێن بۆ پتر گه‌هاندنا گله‌ و گازندیێن ئێزدیان”.

ئه‌ندازیار، خالد نه‌رمۆ، ئاشكه‌را كر:” ب ریێا سازیێن شه‌رعى ل هه‌رێما كوردستانى و عێراقى ده‌وله‌تان ژى دانپێدان ب جڤاتا بلندا ئێزدیان بهێته‌ كرن وه‌كو نوونه‌رێ شه‌رعى بۆ خه‌لكێ ئێزدى وه‌كو ئایین و جڤاك هیڤدارین ئه‌ڤ كومبونێن میرێ ئێزدیان به‌رده‌وام بن ل كۆمبوونێن بهێت ژى بریار بهێنه‌ دان”.

ئاماژه‌ دا وى چه‌ندێ:” به‌رى نوكه‌ ژى هنده‌ك كار ل سه‌ر ڤێ بابه‌تى یێن هاتیه‌ كرن بۆ پێكئێنانا جڤاتا بلند یا ئێزدیان هیڤدارین پێنگاڤیێن رژد بهێنه‌ هاڤیتن بۆ دامه‌زراندنا سازیه‌كا رێڤه‌به‌ر یا ئێزدیان ژلایێ ئاینی و جڤاكێ ڤه‌”.

زێده‌تر گۆت:” هه‌تا نوكه‌ پێشنیاز هه‌نه‌ هێشتا نه‌بووینه‌ بریار پتریا پیشنیازان ئه‌ون كو جڤاتا روحانیا ئێزدیان پێدڤیه‌ هه‌ر بمینیت بۆ كاروبارێن ئاینی و پێشنیاز هه‌یه‌ پتر بهێته‌ به‌رفره‌هكرن ئێزدى ژ هه‌موو ده‌ڤه‌ران بینه‌ ئه‌ندامێن جڤاتا روحانیا ئێزدیان بۆ كارۆبارێن ئاینى دێ هه‌ر جڤاتا روحانى مینیت لێ جڤاتا بلندا ئێزدیان بۆ كارۆبارێن ئێدارى و جڤاكێ بیت ده‌مێ هێته‌ دامه‌زراندن هه‌تا نوكه‌ ئه‌ڤ بابه‌ت د گه‌نگه‌شى دایه‌ هێشتا چو بریار ل سه‌ر نه‌هاتینه‌ دان”.