محەمەد گڤاری
دبێژن کوڕەک ژ هۆزەکا عەرەبان پرۆسا هەڤژینییێ پێکئینا و چۆ دهێلینا زێڕیندا، پشتی بۆرینا سالەکێ شەر دناڤبەرا وی و کەسەکێ دیدا چێبوو دئەنجامدا وی کوری هەڤڕکێ خۆ کوشت، ژبەر ڤێ رویدانێ دناڤ هۆزا خۆ بارکر و دگەل هەڤژینا خۆ قەستا دەڤەرا هۆزەکادی یاعەرەبان کر، بگورەی ڕەوشت و تیتالێن وان قەستا جڤاتا شێخێ هۆزێ وێ دەڤەرێ کر و گۆتێ ئەڤە ڕەوشا منە و ئەز یێ کەتیمە دەراڤەکێ تەنگ، شێخی گوتێ ئەڤە مالاتەیە هزرنەکە تو یێ بێ خودانی دێ هاریکار و پشتەڤانێ وە بم هەتا ڕێکا چارەسەریێ بۆتە و هەڤژیناتە دبینم، رۆژەکێ شێخ لبەر دەرگەهێ وی کوڕی دەرباز بوو دیت هەڤژیناوی لبەر دەرگەهێ حەوشێ یا ڕاوەستایە کو ژنەکا زۆر جوان و بەژن بلند و سەرنج ڕاکێشە ژبەر هندێ جوانیا وێ دلێ شێخی بۆ لایێ خۆ ڕاکێشا، شێخێ عەرەبا هزرێن خۆ کرن دێ چەوا رێکەکێ ڤەبینیت خۆ نێزیکی ڤێ ژنێ بکەت، پشتی چەند ڕۆژان شێخی گازی چەند زەلامێن هۆزا خۆ کر دگەل وی کوڕێ خۆ هاڤێتییە بەختێ وان داکو ب حەوینیت، گۆتە وان من یێ زانی شێخێ فلان هۆزێ مەردە مێرە و خۆدان پێگەهەکێ مەزنە دناڤ هۆزاخۆدا خەلک هەمی گوهدارییا وی دکەن ڤێجا هوین پێکڤە هەرن قەستا وی بکەن و بۆ من دەنگو باسێن وی بینن کانێ ئەڤ گۆتنە ڕاستن یان ژی نە، بێگومان وان زەلامان دگەل وی کوڕێ خۆ هاڤێتییە بەختێ وان دگەل دابوو، ئەڤ سەرەدانە پێدڤی ب چەند ڕۆژایە هەتا ڤەدگەرێن، وێ ڕۆژێ شێخی نەزانی دێ کەنگی بیتە شەڤ هەتا قەستا مالا وێ ژنێ بکەت، دەمێ شەڤ ب سەرداهاتی شێخی ل نیڤا شەڤێ قەستا مالا وێ ژنێ کر، ل حەوشێ هەلنگڤت و دەنگ ژپێت وی هات، ژنێ ئاگەھ ژدەنگێ پێت وی بوو، گۆتێ ئەو کییە؟
شێخی گۆتێ ئەزم شێخێ وێ هۆزا تو زەلامێ ته حەواندی.
وێ ژنێ گۆتێ وەی سەرچاڤێت من شێخێ دەلال بەلی بۆچی ل نیڤا شەڤێ تو هاتی؟
شێخی گۆت جوانیاتە دل و دەرۆنێ من یێ داگیرکری من ڤیا ئەڤ شەڤە مێهڤانێ تەبم.
هەڤژینا وی کورێ گۆتێ سەرچاڤان ئەز یا ڕازی مە بەلێ ب مەرجەکی؟
شێخی گۆتێ مەرجێ تە ؟
گۆتێ دبێژن خوێ ب گوشتی وەردکەن دا گوشت گەنی نەبیت بەلێ ئەگەر خۆێ گەنی بوو چارە چییە!
ڤێجا هەرە بەرسڤا ڤێ گۆتنێ بۆ من بینە پاشی وەرە دەف من، ل شەڤا باشتر دەمێ کۆچکا شێخی پڕبوویی ژمرۆڤان شێخی گۆتە وان ئەرێ گۆتنەکا هەی دبێژن خوێ ب گوشتی وەردکەن دا گەنی نەبیت، بەلێ ئەگەر خوێ گەنی بوو چارە چییە؟
هەر ئێکی بۆچووناخۆ گۆت، بەلێ شێخ ب گۆتنا کەسێ ڕازی نەبوو، ب تنێ مرۆڤەک ل جڤاتا شێخی بێ دەنگی هەلبژارت و نەئاخفت هەتا جڤات ڤەڕەڤی و هەر کەس چۆ مالاخۆ ب تنێ ئەو ل جڤاتا شێخی ماڤە، شێخی گۆتێ ئەرێ بۆچی تو نەئاخفتی و تە چ نەگۆت؟
وی مرۆڤی گۆتە شێخی من ڤیا ئەز ب تنێ بۆتە ب ئاخڤم، ئەرێ شێخێ من شێخێ عەرەبان ڕاستە خوێ ب گوشتی وەردکەن داگەنی نەبیت بەلێ ئەگەر خوێ گەنی بوو چارە چییە، توژی ئەو خوێی، ئەگەر خوێ ژ گەنی بوونێ هاتە پاراستن هەر تشتەک دێ هێتە پاراستن، ئەو ژنا تە حەز لێکری نەڤیا هەتکا وە بەت و کەساتییا وە دناڤ هۆزێدا سڤک بکەت و بشکێنیت، لەوا ئەڤ مەرجە دانا بەر سینگێ تە دا ژدەهمەن پیسیێ بێیە پاراستن، وێ ژنا جوان گۆتە وە خوێ پێدڤییە بۆ گوشتی دا گەنی نەبیت، بەلێ ئەگەر خوێ گەنی بوو چارە چییە، ڤێجا تو ئەو خوێی هشیاربە هەردەم خوێ بە دا گوشت گەنی نەبیت، بەلێ ئەگەر تو گەنی بوویی دێ خەلکێ تە هەمی گەنی بیت پاشی چ چارە نابن، ل ڤێرە جهێ پرسیارێ یە ئەرێ ئەگەر دەستهەلاتدار یان مەلا و سیاسەتڤان و وەزیر و ڕێڤەبەر بوونە خوێیا گەنی چارە چییە و کی دێ وان چێکەت ؟
هاتییە ڤەگوهاستن.
