سهرۆكێ ههرێما كوردستانێ نێچیرڤان بارزانى پێشوازى ل كونسۆلێ نوو یێ كوریا باشۆر كر و د دیدارهكێدا، ههردوو لایان دووپاتى ل پێشڤهبرنا پهیوهندییان و بهرفرههكرنا كولتۆر و ههماههنگى و هاریكارییێ ب تایبهتى دبوارێ پهروهرده و فێركرنێدا كر.
ل دووڤ راگههاندنا سهرۆكایهتییا ههرێما كوردستانێ، ئهڤرۆ 25ى ئهیلولا 2022ێ سهرۆكێ ههرێما كوردستانێ نێچیرڤان بارزانى پێشوازى ل كونسۆلێ نوو یێ كوریا باشۆر ل ههرێما كوردستانێ چۆ كیجۆنك كر.
سهرۆكایهتییا ههرێمێ دیاركر، د دیدارهكێدا نێچیرڤان بارزانى پشتى ب خێرهاتن و پیرۆزباهییا دهسبكاربوونێ ل كونسۆلى، ههموو پشتهڤانییا خوه بۆ سهرخستنا ئهركێن وى نیشاندا و سوپاسى و پێزانینێن ههرێما كوردستانێ بۆ هاریكارییێن مرۆڤایهتى و پشتهڤانییا كوریا باشۆر دووپاتكرن، كو وهلاتێ ناڤبرى ب رێكا تیما سهربازى یا زهیتۆن و ئاژانسا كویكا یا كورى پێشكێشى ههرێما كوردستانێ كرینه.
ههروهسا دراگههاندنێدا هاتییه، كونسۆلێ گشتى یێ كوریا باشۆر دووپاتكر، پهیوهندییێن وهلاتێ وى دگهل ههرێما كوردستانێ د تایبهتن، و هیڤى خواستن بشێن ئهوان پهیوهندییان بۆ ئاستهكێ بلندتر و بهرفرههتر ببهن، و كورتییهك دهربارهى بهرههڤى و چالاكییێن وهلاتێ خوه ل ههرێما كوردستانێ و هاندانا كهرتێ تایبهتێ كورى و دهرفهتا وهبهرهێنانێ بۆ كۆمپانییێن كورى ل ههرێما كوردستانێ روونكر.
