پەرلەمانتارەک: ڤەگەڕاندنا خێزانێن داعشێ مەترسییە بۆ سەر عیراقێ

ئاژانسا خانی ” تایبەت:

کاروانەکێ دی یێ کەس و کارێن داعش ل کەمپا ھۆلێ ھاتییە ڤەگەڕاندن بۆ عێراقێ و ل مووسل ھاتینە جھگیر کرن” پەرلەمانتارەک ژی ئاشکرا دکەت، ڤەگەڕاندنا کەس و کارێن داعش مەترسییە بۆ سەر پاشەڕۆژا عێراقێ.

شێروان دوبەردانی، پەرلەمانتارێ پارتی ل پەرلەمانێ عێراقێ بۆ ئاژانسا خانی دیارکر” بڕیار وەسایە ٣٠ ھزار کەس و کارێن داعش یێن نوکە ل کەمپا ھۆلێ یا رۆژئاڤایێ کوردستانێ بھێنە ڤەگەڕاندن بۆ عێراقێ، حوکمەتا عێراقێ کەمپا جەدعە ل مووسل بۆ وەرگرتنا کەس و کارێن داعش بەرھەڤکرییە و ھەتا نوکە ٩ کاروان ڤەگەڕیاینە مووسل و ھژمارا خێزانێن داعش یێن ڤەگەڕیایی بۆکەمپا جەدعە گەھشتییە ھزار و ٥٠٠ کەسان.

ناڤهاتی گۆت ژی” ڤەگەڕیانا کەس و کارێن داعش بۆ عێراقێ مەترسی ھەیە ل سەر رەوشا ئەمنییا عێراقێ، چونکی زارۆکێن داعش نوکە بووینە سنێلە و ھندەک ژ وان چەکدارێن داعش یێن خێزانێن وان کەمپا ھۆل ھێشتا ماینە و ل چیایێ مەخموور و دەڤەرێن دی یێن عێراقێ نە، لەوما ڤەگەڕیانا کەس وکارێن وان دێ کارەکێ وەسا کەت پاشەڕۆژێ پەیوەندیێ ب چەکدارێن داعش بکەن.