مه‌سرور بارزانى و بالیۆزێ ڤاتیكانێ كۆمبوون

سه‌رۆكێ حكومه‌تا كوردستانێ مه‌سرور بارزانى پێشوازى ل بالیۆزێ ڤاتیكانێ مه‌تران میتیا لێسكۆڤارى كر و چه‌ند بابه‌ت گوتوبێژكرن.

ئه‌ڤرۆ 29ى ئه‌یلولا 2022ێ سه‌رۆكێ حكومه‌تا هه‌رێما كوردستانێ مه‌سرور بارزانى پێشوازى ل بالیۆزێ ڤاتیكان ل عیراقێ میتیا لێسكۆڤارى كر كو د دیداره‌كێدا ره‌وشا گشتى یا عیراقێ و پێشڤه‌برنا په‌یوه‌ندییێن هه‌رێما كوردستان و ڤاتیكانێ گوتوبێژكرن.

بالیۆزێ ڤاتیكانێ سلاڤ و رێز و سوپاسى و پێزانینێن قه‌داسه‌تا پاپاى گه‌هاندنه‌ سه‌رۆكێ حكومه‌تا هه‌رێما كوردستانێ بۆ ل هه‌وارچوون و مێڤانكرنا ئاواره‌ و په‌نابه‌ران ب گشتى و كریستیانان ب تایبه‌ت كو د سه‌قایه‌كێ ئارام و ئاشتییانه‌دا ل هه‌رێما كوردستانێ دژین.

دهه‌مان دیداردا مه‌سرور بارزانى پابه‌ندبوونا حكومه‌تا هه‌رێما كوردستانێ ب پێشڤه‌برنا كولتۆرێ لێبورین و پێكڤه‌ژیانا ئاشتییانه‌ دناڤبه‌را پێكهاته‌یاندا دووپاتكر.