سەرۆكێ هەرێما كوردستانێ و فەرماندێ گشتی یی هێزێن هەڤپەیمانان ل عیراقێ و سووریێ كۆمبوون و دۆپاتی ل گرنگییا بەردەوامییا هاریكارییێن هەڤپەیمانییا ناڤدەولەتی بۆ عیراقێ و هەرێما كوردستانێ كر.
ئەڤرۆ نێچیرڤان بارزانی، سەرۆكێ هەرێما كوردستانێ پێشوازی ل ماتیۆ ماكفارلان، فەرماندێ گشتی یێ هێزێن هەڤپەیمانان ل عیراقێ و سووریێ و شاندێ دگەلدا كر.
ل دویڤ راگەهادنەكا سەرۆكاتییا هەرێما كوردستانێ، د كۆمبوونێ دا دوماهی پێشهاتیێن ئەمنی و گەف و مەترسییێن تیرۆرێ و رووبرووبوونا داعشێ ل عیراقێ و سوورییێ، دوماهی یاداشتا لێكتێگەهشتنێ یا پنتاگۆنێ ل گەل عیراقێ و هەرێما كوردستانێ، پرۆسا چاكسازییێ ل وەزارەتا پێشمەرگەی و ئێكخستنا هێزێن پێشمەرگەی هاتنە گۆتوبێژكرن.
سەرۆكێ هەرێما كوردستانێ و فەرماندێ گشتی یێ هێزێن هەڤپەیمانان ل عیراقێ و سوورییێ دۆپاتی ل گرنگییا بەردەوامبوون و هاریكاری و پشتەڤانییا هەڤپەیمانان بۆ عیراقێ و هەرێما كوردستانێ كر ژبۆ وێ یەكێ ب ئێكجاری داعش و مەترسی و گەفێن وان ل سەر ئارامییا عیراقێ و سووریێ و دەڤەرێ بهێنە ب دوماهی ئینان.
د كۆمبوونێ دا بەحس ل مانا هێزێن هەڤپەیمانان ل عیراقێ و سووریێ هاتەكرن و ل دۆر وێ یەكێ ماكفارلان پابەندییا هەڤپەیمانییا ناڤدەولەتی ب بەردەوامییا پشتەڤانییا عیراقێ و هەرێما كوردستانێ د شەرێ دژی تیرۆرێ دا دۆپاتكر و هەردوولا هاریكاری هەماهەنگییا دناڤبەرا سۆپایێ عیراقێ و پێشمەرگەی بۆ رووبرووبوونا داعشێ ب پێدڤی زانی.
