وهزارهتا چاندن و ژێدهران ل حكومهتا ههریما كوردستانێ راگههاند، ئهڤ ساله هنارێن ههلهبجه وهكو براندهكا كوردى دێ گههنه بازارێن ئیماراتێ و د نوكهدا بهرههڤى ژلایێ كوالیتى و لوجستیدا دهێنهكرن.
بێگهرد تالهبانى وهزیرا چاندنێ و ژێدهرێن ئاڤێ ل حكومهتا ههرێما كوردستانێ، سهرپهرشتییا كۆمبوونا وهزارهتێ ب ئامادهبوونا هژمارهكا شیرهتكارێن وهلاتێ هۆلهندا و تیمهكا بسپۆر یا نڤێسینگهها سهرۆكوهزیرێن حكومهتا ههرێما كوردستانێ كر، ل دووڤ راگههاندنهكا وهزارهتێ، دكۆمبوونێدا دانوستاندن ل دۆر چهندین بوارێن گرنگێن چاندنێ هاته كرن كو پێكهاتبوون ژ:
1 – پرۆسهیا بازاركرن و براندكرنا بهرههمێ نافخۆ كو ئهڤ ساله بهرههمێ هنارێن ههلهبجه وهكو براندهكا كوردى دێ گههیته بازارێن ئیماراتێ و دنوكهدا بهرههڤى ژلایێ كوالیتى و لوجستیڤه دهێنهكرن.
2 – دانوستاندن دهربارهیى چهوانییا پهسهندكرنا پهیپهرێ دناڤبهرا وهزارهتا چاندن و ژێدهرێن ئاڤێ و حكومهتا هۆلهندا دا هاتهكرن، بۆ هندێ كو خال و برگه و ماددهیێن پشتى ژلایێ جڤاتا وهزیرانڤه دهێنه پهسهندكرن، بكهڤنه دبوارێ بجهئینانێدا.
3 – دانوستاندن ل سهر بابهتێ چارهسهركرنا ئاریشهیێن ئهرد و زهڤییان هاته كرن، بۆ هندێ كو ئاستهنگ و رۆتین لبهر سینگێ جووتیار و وهبهرهێنهرا و خۆدان پرۆژهیان كێمببن.
ههروهسا ل دووڤ راگههاندنا وهزارهتێ، ل دووماهییا كۆمبوونێ بهحس ل بابهتێ بازاركرنا بهرههمێ چاندنێ و رێكخستنا شێوازێ رێنمایى یێن چاندنێ و هاریكاریكرنا جووتیاران ل چهوانییا بكارئینانا تهكنولۆجیا پێشكهڤتى یا چاندنێ هاته كرن.
