جوان رۆژبەیانی: پێدڤییە حوکمەتا عیراقێ رەوشا دەڤەرێن کوردستانی ئاسایی بکەت

ئاژانسا خانی ” تایبەت:

سەرۆکا لژنا دەڤەرێن کوردستانی ل پەرلەمانێ کوردستانێ ئاشکرا کر، پەرلەمان دێ داخوازێ ژ لایەنێن سیاسی کەت بۆ ڤێ چەندێ ئاسایی کرنا رەوشا دەڤەرێن کوردستانی و بجەئینانا مادێ ١٤٠ ئەجێندایا سەرەکییا حوکمەتا نوو یا عێراقێ بیت.

جوان رۆژبەیانی، زێده‌تر بۆ ئاژانسا خانی دیار کر” مە وەکو لژنا تایبەتمەند نڤیسارەک ئاراستەیی دەستەیا سەرۆکاتییا پەرلەمانێ کوردستانێ کرییە و تێدا داخواز کرییە، پەرلەمان داخوازێ ژ لایەنێن سیاسی یێن ھەرێما کوردستانێ بکەت پرسا بجەئینانا مادێ ١٤٠ یێ دستوورێ عێراقێ و ئێکلاکرنا چارەنڤیسێ دەڤەرێن کوردستانی یێن دەرڤەیی ئیدارا حوکمەتا ھەرێما کوردستانێ ببنە کارێ سەرەکییێ حوکمەتا داھاتییا عێراقێ و رێکكەفتنا شنگالێ بھێتە بجەئینان، یاکو دناڤبەرا ھەردو حوکمەتان دا ھاتییە ئیمزا کرن.

جوان رۆژبەیانی گۆت ژی” هه‌كه‌ حوکمەتا عێراقێ پێگیری ئاسایی کرنا رەوشا دەڤەرێن کوردستانی و بجەئینانا مادێ ١٤٠ نەبیت دڤێت پەرلەمانێ عێراقێ لێپرسینێ دگەل حوکمەتا عێراقێ بکەت، چونکی ئەڤە چەندین حوکمەت ل عێراقێ دھێنە پێکئینان پێگیریێ ب سۆزێن خوە ناکەن بۆ ئاسایی كرنا رەوشا دەڤەرێن کوردستانی.