ب فه‌رمانا مه‌سرور بارزانى پارچه‌یێن ئه‌ردى دێ ب هژماره‌كا خه‌لكێ كێمده‌رامه‌ت هێنه‌ دان

ب فه‌رمانا مه‌سرور بارزانى سه‌رۆكێ حكومه‌تا هه‌رێما كوردستانێ مالێن تاخێن لیوا ره‌ش‌ و جه‌مه‌لون ل كه‌لار دێ هێنه‌ قه‌ره‌بووكرن و پارچه‌یێن ئه‌ردى دێ پێ هێنه‌ دان.

وه‌زاره‌تا باژێرڤانى و گه‌شتوگوزارێ د راگه‌هاندنه‌كێدا دیاركر، مه‌سرور بارزانى سه‌رۆكێ حكومه‌تا هه‌رێما كوردستانێ ب مه‌ره‌ما قه‌ره‌بووكرن و چاره‌سه‌ركرنا ئاریشه‌یان، بریاردا 163 پارچه‌یێن ئه‌ردى بۆ مالێن تاخێن لیوا ره‌ش و جه‌مه‌لون ل كه‌لار بهێنه‌ دابینكرن، كو جهێ ئه‌وان مالان یێ گونجاى نینه‌ و مه‌ترسییا هه‌رفین و پیڤه‌له‌رزان ل سه‌ر هه‌یه‌.

ئاماژه‌ ب هندێ ژى دا، ئه‌و فه‌رمانا سه‌رۆكێ حكومه‌تا هه‌رێما كوردستانێ ئێكسه‌ر د به‌رژه‌وه‌ندییا ئاكنجییێن ئه‌وان هه‌ر دو جهاندایه‌، ژبه‌ركو ژ پشتى راپه‌رینێ و ژ ئه‌گه‌رێ هه‌ژارى و كێمده‌رامه‌تییێ ل ئه‌وى جهێ نه‌یێ جوان ژیاینه‌ و هه‌تا نوكه‌ لێ ماینه‌ و به‌رده‌وام مه‌ترسی ل سه‌ر ژیانا وان هه‌یه‌، له‌وما سه‌رۆكێ حكومه‌تێ پارچه‌یێن ئه‌ردى ل سه‌ر رووبه‌رێ ( 200م2 ) ل جهه‌كێ هه‌ژى و گونجاى یێ سنۆرێ باژێرڤانییا كه‌لار بۆ دابنكرینه‌ داكو ژ وێ ره‌وشێ قۆرتالببن.