وه‌زاره‌تا دارایى پاره‌یێ پێنج به‌رپرسان بلۆك كر

وه‌زاره‌تا دارایى یا عیراقێ ژبه‌ر كه‌یسا دزینا دو ملیار و 500 ملیۆن دۆلارێن بانكا رافیده‌ین، پاره‌یێ چار به‌رپرسێن ده‌سته‌یا گشتییا باجێ و به‌رپرسه‌كێ دى یێ وه‌زاره‌تا دارایى بشێوه‌یه‌كێ ده‌مكى بلۆك كر، و بۆ ئه‌ڤێ مه‌ره‌مێ ژى نڤیساره‌ك ئاراسته‌یى هژماره‌كا بانكێن عیراق و هه‌رێما كوردستانێ كر.

ل دووڤ نڤیسارا وه‌زاره‌تا دارایى یا عیراقێ كو ل 20 چریا ئێكێ یا 2022ێ ده‌ركه‌ڤتییه‌، داخواز ژ 44 بانكێن عیراق و هه‌رێما كوردستانێ هاتییه‌ كرن پاره‌یێ ڤه‌گوهاستى و یێ نه‌ ڤه‌گوهاستى یێ ئه‌وان پێنج به‌رپرسان بشێوه‌یه‌كێ ده‌مكى بلۆك ببن، و ئه‌و بانكه‌ زانیارییان ده‌رباره‌ى ئه‌و پاره‌یێ ئه‌وان كه‌سان ل بانكان دانایى بده‌ت، و بێى ره‌زامه‌ندییا وه‌زاره‌تا دارایى رێكێ ب مامه‌له‌كرنێ ب ئه‌وى پاره‌ى نه‌ده‌ت.

وه‌زاره‌تا دارایى ناڤێن ئه‌وان كه‌سێن دخوازیت پارێ وان بلۆك ببیت دنڤیسارا خوه‌دا دیاركرینه‌ كو هه‌ر ئێك ژ سه‌رپه‌رشتێ به‌شێ دارایى، رێڤه‌به‌رێ به‌شێ دارایى، بریكارێ به‌شێ دارایى، هاریكارێ رێڤه‌به‌رێ گشتى یێ ده‌سته‌یا باج و رێڤه‌به‌رێ گشتییێ فه‌رمانگه‌ها ئابوورى ل وه‌زاره‌تا دارایى نه‌.