ئەڤرۆ دیاردەیا رۆژغەیرینێ ل هەرێما كوردستانێ و عیراقێ دێ روویدەت و زانایێن بوارێ فەلەكی رێنماییان ل وەلاتییان دكەن كو ب چ رەنگان راستەوخۆ تەماشەی رۆژغەیرینێ نەكەن.
وەزارەتا ڤەگۆهاستن و گەهاندنێ یا حكومەتا هەرێما كوردستانێ چەند رێنماییەك ل دۆر رۆژغەیرینێ و سەحكرنا وێ بەلاڤكرینە و داخواز ژ وەلاتییان كریە ب چ رەنگان راستەوخۆ تەماشەی رۆژغەیرینێ نەكەن ب تایبەت زارۆك، ژبەركو سەحكرنا راستەوخو یا رۆژغەیرینێ دبیتە ئەگەرێ ژدەستدانا هەمیشەی یا دیتنێ ب تایبەت زارۆكان و چ چارەسەری ژبۆ نینن.
زانیارییێن فەلەكی ئاماژە ب وێ یەكێ دایە ئەڤرۆ رۆژا سێشەمبی رۆژغەیرینەكا نیمچەیی دێ ل ئەسمانێ هەرێما كوردستانێ روویدەت. رۆژغەیرین ژ دەمژمێر 12:59ی پشتی نیڤرۆ دێ دەستپێكەت، ل دەمژمێر 2:17ی پشتی نیڤرۆ بلندترین ئاستێ رۆژغەیرینا نیمچەی دێ هێتە تۆماركرن و هەیڤ دێ نێزیكی 51% یا روویێ رۆژێ ڤەشێریت، پاشان هێدی هێدی دێ دویركەڤیت و دەمژمێر 3:30ی پشتی نیڤرۆ دیاردا رۆژغەیرینێ ب تەمامی دێ ب دوماهیك هێت.
ئەو دەڤەرێن وێ دیاردێ دبینن پێكدهێن ژ رۆژهەلاتا ناڤەراست، رۆژهەلاتا ئەورۆپا، باكوور و رۆژهەلاتا ئەفریقیا و رۆژئاڤایا ئاسیا.
