نێچیرڤان بارزانى ئیمزا لسه‌ر قانوونا درێژكرنا ژییێ خۆلا پێنجێ یا په‌رله‌مانى نه‌كر

سه‌رۆكێ هه‌رێما كوردستانێ ئیمزا لسه‌ر قانوونا درێژكرنا ژییێ خۆلا پێنجێ یا په‌رله‌مانێ كوردستانێ نه‌كر، كو ب به‌هرا پترا ده‌نگێن په‌رله‌مانتاران هاتییه‌ په‌سه‌ندكر.

پشتى كو په‌رله‌مانێ كوردستانێ ب به‌هرا پترا ده‌نگان درێژكرنا ژییێ خۆلا پێنجێ یا په‌رله‌مان په‌سه‌ندكرى، ده‌سته‌یا سه‌رۆكایه‌تییا په‌رله‌مانێ كوردستانێ ئه‌و قانوونه‌ ب مه‌ره‌ما ئیمزاكرن یان ره‌تكرنێ ب نڤیساره‌كا فه‌رمى ئاراسته‌یى سه‌رۆكایه‌تییا هه‌رێما كوردستانێ كر، به‌لێ ب گوتنا دلشاد شه‌هاب شیره‌تكارێ بلند یێ سه‌رۆكێ هه‌رێما كوردستانێ، نێچیرڤان بارزانى ئه‌و قانوونه‌ ئیمزانه‌كرییه‌.

هه‌ر قانوونه‌كا ژ په‌رله‌مانى ب ده‌ركه‌ڤیت، ب نڤیساره‌كا فه‌رمى ئاراسته‌یى سه‌رۆكایه‌تییا هه‌رێما كوردستانێ دهێته‌كرن، داكو سه‌رۆكێ هه‌رێمێ بوچوونا خوه‌ لسه‌ر دیاربكه‌ت، و سێ هه‌لبژارتن بۆ وێ مه‌ره‌مێ لبه‌ر سینگێ سه‌رۆكێ هه‌رێما كوردستانێنه‌ ئه‌وژى، ئیمزاكرن، ره‌تكرن و بێده‌نگى.

نێچیرڤان بارزانى سه‌رۆكێ هه‌رێما كوردستانێ ئیمزا لسه‌ر قانوونێ نه‌كرییه‌، لێ ره‌ت ژى نه‌كرییه‌، و ئه‌گه‌ر پشتى 15 رۆژان سه‌رۆكێ هه‌رێما كوردستانێ ئیمزایێ نه‌كه‌ت، ئه‌و قانوونه‌ بشێوه‌یه‌كێ ئێكسه‌ر دێ جێگیر بیت و به‌رى 6-11-2022ێ ب ئیمزایا سه‌رۆكێ په‌رله‌مانى ل رۆژنامه‌یا وه‌قائیعدا به‌لاڤبیت.

پێشنیازا قانوونا به‌رده‌وامبوونا خۆلا پێنجێ یا په‌رله‌مانێ كوردستانێ ژ سێ مادده‌ و ئه‌گه‌رێن جۆدا پێكهاتبوو، رۆژا 9-10-2022ێ ب ده‌نگێ پتر یا په‌رله‌مانتاران و ب 80 ده‌نگان هاته‌ په‌سه‌ندكرن.