ئه‌ڤرۆ نه‌هى چریا دووێ یا سالا 2022ێ جڤاتا وه‌زیران ب سه‌رپه‌رشتییا سه‌رۆكوه‌زیران مه‌سرور بارزانى كۆمبوو.
ل ده‌ستپێكا كۆمبوونێ سه‌رۆكوه‌زیران پیرۆزباهى ل تیما وه‌زارى یا پارتى كر، ب هه‌لكه‌ڤتا سه‌ركه‌ڤتنا كۆنگرێ 14ێ یێ پارتى، پاشان دارا ره‌شید وه‌زیرێ پلاندانانێ ب ناڤێ تیما وه‌زارى یا ئێكه‌تى نیشتیمانى كوردستان و دانا عه‌بدولكه‌ریم وه‌زیرێ ئاڤه‌دانكرن و ئاكنجیبوونێ و سه‌رۆكێ تیما وه‌زارى یا گوران ب ناڤێ بزاڤا گوران، هه‌روه‌سا ئه‌ندامێن دى یێن جڤاتێ پیرۆزباهى ل تیما وه‌زارى یا پارتى كر ب هه‌لكه‌ڤتا سه‌ركه‌ڤتنا كارێن كۆنگرێ 14ێ یێ پارتى دیموكراتى كوردستان.
برگه‌یا ئێكێ یا كۆمبوونێ پێكهاتبوو ژ گوتوبێژكرنێ ل دۆر بریاره‌كا به‌رێ یا جڤاتا وه‌زیران یا تایبه‌ت ب نه‌خشه‌رێیا حكومه‌تا هه‌رێما كوردستانێ بۆ په‌یوه‌ندییێن نوو یێن دناڤبه‌را به‌غدا و هه‌ولێر دا، پشتى پێكئینانا كابینه‌یا نوو یا حكومه‌تا نوو یا حكومه‌تا فیدرال ب سه‌رۆكایه‌تییا محه‌مه‌د شیاع سوودانى سه‌رۆكوه‌زیران و میكانیزما چاره‌سه‌ركرنا ئاریشه‌یێن هه‌لاویستى یێن دناڤبه‌را هه‌رێما كوردستانێ و حكومه‌تا فیدرالدا لسه‌ر بنه‌مایێن ده‌ستوورى هه‌روه‌كو د به‌رنامه‌یێ (المنهاج الوزاري)یێ كابینه نوودا هاتى و ژلایێٍ جڤاتا نوونه‌رێن عیراقێڤه هاتییه په‌سه‌ندكرن، ب تایبه‌ت كه‌یسا مادده‌یێ 140یێ ده‌ستوورێ تایبه‌ت ب ده‌ڤه‌رێن كوردستانى یێن ژ ده‌رڤه‌ى ئیداره‌یا هه‌رێما كوردستانێ ڤه، هه‌روه‌سا به‌شه بودجه‌یا هه‌رێما كوردستانێ و كه‌یسا نه‌فت و گازێ و پشكدارییه‌كا ژ هه‌ژى هه‌رێما كوردستانێ د دامه‌زراوه‌یێن فیدرالى و بابه‌تێ ماف و شایسته‌یێن ده‌ستوورى یێن پێشمه‌رگه‌ى و بابه‌تێن دى وه‌ك پرۆژه قانوونا ( دادگه‌ها فیدرالى، جڤاتا فیدرالى و نه‌فت و گاز)ێ هاتنه گوتوبێژكرن.
پشتى گوتوبێژكرنا ئه‌ڤێ برگه‌یێ بریار هاته دان شاندێ دانوستاندنان دگه‌ل حكومه‌تا فیدرالى ژ ئه‌ڤان كه‌سان پێكبهێت، وه‌زیرێ دارایى، وه‌زیرێ سامانێن سرۆشتى ب وه‌كاله‌ت، وه‌زیرێ پلاندانانێ، سه‌رۆكێ دیوانا جڤاتا وه‌زیران، سكرتێرێ جڤاتا وه‌زیران، سه‌رۆكێ فه‌رمانگه‌ها هه‌ماهه‌نگى و دوڤچوونان و په‌یڤدارێ حكومه‌تا هه‌رێما كوردستانێ، و هاته راسپاردن كو ل نێزیكترن ده‌م و ژ چارچووڤێ مافێن ده‌ستوورى و بریارێن جڤاتا وه‌زیران یێن تایبه‌ت ب كه‌یسێن هه‌لاویستى، ده‌ست ب دانوستاندنان بكه‌ن، و دووپاتییێ ل بجهئینانا كارنامه‌یا حكومه‌تا فیدرال و ئه‌و رێككه‌ڤتنا سیاسى یا ل جڤاتا نوونه‌رێن عیراقێ ده‌نگ لسه‌ر هاتییه دان بكه‌ن.
