جووتیار عادل: چ بهانه‌ نه‌ماینه‌ كو به‌غدا نه‌چاربكه‌ت دگه‌ل حكومه‌تا هه‌رێمێ رێكنه‌كه‌ڤیت

په‌یڤدارێ حكومه‌تا هه‌رێما كوردستانێ راگه‌هاند، لژنه‌یه‌ك هاتییه‌ پێكئینان بۆ هندێ سه‌ره‌دانا به‌غدا بكه‌ت و دانوستاندنان دگه‌ل حكومه‌تا نوو یا عیراقێ بكه‌ت، لێ چاڤه‌رێیى به‌غدایه‌ كو ده‌مێ سه‌ره‌دانێ دیاربكه‌ت، و گوت ژى : چ بهانه‌ نه‌ماینه‌ كو به‌غدا نه‌چار بكه‌ت دگه‌ل حكومه‌تا هه‌رێما كوردستانێ رێكنه‌كه‌ڤیت، و ئه‌و د رژدن دگه‌ل حكومه‌تا نوو یا عیراقێ رێكبكه‌ڤن.

ئه‌ڤرۆ 10ى چریا دووێ یا سالا 2022ێ جووتیار عادل په‌یڤدارێ حكومه‌تا هه‌رێما كوردستانێ د پرێسكونفرانسه‌كیدا و ل دۆر قانوونا بودجه‌یا هه‌رێما كوردستانێ، به‌لاڤكرنا نه‌فتا سپى ب سه‌ر وه‌لاتییێن هه‌رێما كوردستانێ، سه‌ره‌دانا شاندێ حكومه‌تێ بۆ به‌غدا، ئاریشه‌یێن جووتیارێن ده‌رڤه‌ى ئیداره‌یا هه‌رێما كوردستانێ به‌رسڤا رۆژنامه‌ڤانان دا.

ل دۆر رێككه‌ڤتنا دگه‌ل حكومه‌تا نوو یا عیراقێ كو محه‌مه‌د شیاع سوودانى سه‌رۆكایه‌تییا وێ دكه‌ت، د. جووتیار عادلى راگه‌هاند، حكومه‌تا هه‌رێما كوردستانێ و كابینه‌یا نه‌هێ ب شێوه‌یه‌كێ تایبه‌ت هه‌ر ل ده‌ستپێكێ نیازه‌كا جددى هه‌بوو كو دگه‌ل حكومه‌تا عیراقێ رێكبكه‌ڤیت، و رێككه‌ڤتن ژى هاتییه‌ كرن، به‌لێ نه‌هاتییه‌ بجهئینان، و گوت ژى، نوكه‌ ئه‌وان دڤێت بشێوه‌یه‌كێ جددى دگه‌ل به‌غدا كاربكه‌ن، و بۆ ئه‌ڤێ چه‌ندێ ژى لژنه‌یه‌ك هاتییه‌ پێكئینان و چاڤه‌رێی حكومه‌تا عیراقێ دكه‌ن داكو بۆ دانوستاندنێ لسه‌ر بابه‌تێ نه‌فت ، بودجه‌، مادده‌یێ 140 و چه‌ند بابه‌تێن دى یێن گرێداى هه‌رێما كوردستانێ سه‌ره‌دانا به‌غدا بكه‌ن.

په‌یڤدارێ حكومه‌تا هه‌رێما كوردستانێ ل دۆر هنارتنا به‌شه‌ بودجه‌یا هه‌یڤانه‌ یا هه‌رێما كوردستانێ راگه‌هاند، به‌رى نوكه‌ ل دۆر بودجه‌ و چه‌وانییا هنارتنا به‌شه‌ بودجه‌یا هه‌رێما كوردستانێ دگه‌ل حكومه‌تا عیراقێ رێككه‌ڤتینه‌، لێ رێككه‌ڤتن نه‌هاتییه‌ بجهئینان، نوكه‌ ئه‌و د جددینه‌ و حه‌زدكه‌ن دگه‌ل به‌غدا بگه‌هنه‌ رێككه‌ڤتنێ داكو شایسته‌یێن دارایى یێن هه‌رێما كوردستانێ ل دۆڤ ده‌ستوورى بهنێرن.

جووتیار عادلى ئاماژه‌ دا هندێ ژى، نووكه‌ چ بهانه‌ نینن به‌غدایێ نه‌چاربكه‌ت كو رێككه‌ڤتنێ دگه‌ل هه‌ولێرێ نه‌كه‌ت و دیاركر، هه‌ماهه‌نگییه‌كا باش دناڤبه‌را دیوانا چاڤدێرییا دارایى یا هه‌رێما كوردستانێ و دیوانا چاڤدێرییا عیراقێدا هه‌یه‌، و هه‌موو داتا ل دۆر خه‌رجى و داهاتێن حكومه‌تا هه‌رێما كوردستانێ پێ هاتینه‌ دان، له‌وما ئه‌و دوێ باوه‌رێدانه‌ چ بهانه‌ نینن به‌غدا دگه‌ل حكومه‌تا هه‌رێما كوردستانێ رێكنه‌كه‌ڤیت، و گوت: به‌رى نوكه‌ لایه‌نێن سیاسى یێن هه‌رێما كوردستانێ و عیراقێ رێككه‌ڤتن ل دۆر به‌هرا پترا بابه‌تان كرییه‌، لێ ئه‌و كار لسه‌ر بجهئینانا برگه‌یه‌كا ناڤا رێككه‌ڤتنێ دكه‌ن.