سەرۆکایەتییا دو لیژنەیێن پەرلەمانێ عێراقێ دێ بۆ پارتی بن

پەرلەمانتارەکێ فڕاکسیۆنا پارتی ئاشکراکر، ل پاشه‌رۆژه‌كا نێزیک دێ سەرۆک بۆ لیژنەیێن ناڤا پەرلەمانێ عێراقێ ھێنە دیارکرن و گورەی ھژمارا کۆرسیانژی سەرۆکایەتییا دو لیژنه‌یان دێ بۆ پارتی بیت.

خدر مەنتک، پەرلەمانتارێ فڕاکسیۆنا پارتی ل پەرلەمانێ عێراقێ بۆ ئاژانسا خانی دیارکر، بەری پێکئینانا حكومه‌تا نوو یا عێراقێ لیژنەیێن پەرلەمانی ھاتینە پێکئینان، بەلێ دڤێت ھەر لایەنەکێ وەزارەتەکێ ل حوکمەتێ وەر بگریت نابیت سەرۆکێ ھەمان لیژنێ ل پەرلەمانی وەر بگریت، لەوڕاژی ب تەمەنترین کەسێ ناڤا لژنه‌یێ بشێوەیەکێ دەمکی بوویە سەرۆک لیژنه‌یێ ھەتا دھێتە ئێکلاکرن.

خدر مەنتک ئاماژەکر، ل گورەی ھژمارا کۆرسییان دێ سەرۆکێن لیژنێن پەرلەمانی ھێنە بەلاڤکرن، ئەز باوەرم دێ پارتی دیموکراتی کوردستان دو سەرۆک لیژنە ھەبن، ل چەند رۆژێن داھاتی دێ بابەتێ دانانا سەرۆک لیژنەیان ھێتە ئێکلاکرن، بەلێ پێدڤی ب کۆمبوونا کۆتلەیێن سیاسی ھەیە و جارێ دیار نینە دێ کیش سەرۆک لیژنە بۆ پارتی بن.