داهاتێ نه‌فتا عیراقێ ل هه‌یڤا بوورى به‌راورد دگه‌ل هه‌یڤا چریا ئێكێ، ئێك ملیار دۆلاران كێمكرییه، و ئه‌گه‌ر ژى بۆ كێمییا هنارتنێ و داكه‌ڤتنا بهایێ نه‌فتێ ڤه‌دگه‌ریت.
وه‌زاره‌تا نه‌فتا عیراقێ دراگه‌هاندنه‌كێدا سه‌باره‌ت سه‌رجه‌مێ نه‌فتا هنارتى یا هه‌یڤا چریا دووێ یا بوورى راگه‌هاند، ل دووڤ ئامارێن كۆمپانییا سۆمۆ یا كو نه‌فتا عیراقێ دفرۆشیت، ل هه‌یڤا بوورى 99 ملیۆن و 867 هزار و 946 به‌رمیلێن نه‌فتێ هاتینه فرۆتن، و داهاتێ وێ هه‌شت ملیار و 231 ملیۆن دۆلار بوون.
ل دووڤ راگه‌هاندنا وه‌زاره‌تا نه‌فتا عیراقێ، ل هه‌یڤا بوورى سه‌رجه‌مێ نه‌فتا ژ كێلگه‌هێن ناڤه‌راست و باشوورێ عیراقێ هاتییه هنارتن، 97 ملیۆن و 204 هزار و 696 به‌رمیل بوون، دهه‌مان ده‌مدا هنارتنا نه‌فتێ ل كێلگه‌هێن كه‌ركووكێ بۆ به‌نده‌رێن جیهانێ برێكا توركیا گه‌هشته دوو ملیۆن و 363 هزار و 20 به‌رمیلان.
ل دووڤ ئامارا وه‌زاره‌تا نه‌فتێ، عیراقێ رۆژانه سێ ملیۆن و 329 هزار به‌رمیلێن نه‌فتێ فرۆتینه و بهایێ هه‌ر به‌رمیله‌كێ 82.416 دۆلاربوون.
كێمبوونا داهاتێ عیراقێ ژ نه‌فتێ بۆ دوو ئه‌گه‌ران ڤه‌دگه‌ریت، ئێك ژ وان ئه‌وه كو ل هه‌یڤا چریا ئێكێ 104.8 ملیۆن به‌رمیلێن نه‌فتێ هاتینه هنارتن و هه‌ر به‌رمیله‌ك ب 88.5 دۆلاران هاتییه فرۆتن، لێ ل هه‌یڤا چریا دووێ، پێنج ملیۆن به‌رمیل كێمتر هاتینه فرۆتن و بهایێ هه‌ر به‌رمیله‌كێ ژى شه‌ش دۆلاران كێمكربوو.
