شاندێن حكومه‌تا هه‌رێما كوردستانێ و وه‌زاره‌تا نه‌فتا عیراقێ كۆمبوون

شاندێ حكومه‌تا هه‌رێما كوردستانێ ل به‌غدا دگه‌ل وه‌زیرێ نه‌فتا حكومه‌تا عیراقێ كۆمبوو و شێوازێ كاركرنا هه‌ڤپشك دگه‌ل وان گوتوبێژكر.

ئه‌ڤرۆ 13ى كانوونا ئێكێ یا 2022ێ وه‌زاره‌تا نه‌فتا عیراقێ دراگه‌هاندنه‌كێدا ئاماژه‌ ب هندێ دا، حه‌یان عه‌بدلعه‌زیز وه‌زیرێ نه‌فتا عیراقێ دگه‌ل شاندێ حكومه‌تا هه‌رێما كوردستانێ كۆمبوو.

ل دووڤ راگه‌هاندنێ، دئه‌وێ كۆمبوونێدا گوتوبێژا چه‌وانییا كاراكرنا لژنه‌یێن هه‌ڤپشك یێن دناڤبه‌را واندا بۆ دیتنا چاره‌سه‌رییا بابه‌تێن هه‌لاویستى یێن حكومه‌تا هه‌رێما كوردستانێ و حكومه‌تا عیراقێ د برێڤه‌برنا سامانێن سرۆشتیدا هاته‌كرن.

ل دووڤ راگه‌هاندنا حكومه‌تا هه‌رێما كوردستانێ، كۆمبوون یا تایبه‌ت بوو ب دانوستاندكرنێ ده‌رباره‌ى هه‌ماهه‌نگى و به‌رده‌وامبوونا په‌یوه‌ندییێن دناڤبه‌را وه‌زاره‌تا سامانێن سرۆشتى یا حكومه‌تا هه‌رێما كوردستانێ و وه‌زاره‌تا نه‌فتا عیراقێدا و دیتنا میكانیزما كاركرنێ دناڤبه‌را هه‌ردوو لایاندا ب پشتبه‌ستن ب ده‌ستوور و كارنامه‌یا كابینه‌یا نوو یا حكومه‌تا عیراقا فیدرال.

شاندێ حكومه‌تا هه‌رێما كوردستانێ دوێ كۆمبوونێدا پێكهاتبوو ژ كه‌مال محه‌مه‌د وه‌زیرێ سامانێن سرۆشتى یێ حكومه‌تا هه‌رێما كوردستانێ ب وه‌كاله‌ت، ئاوات شێخ جه‌ناب وه‌زیرێ دارایى، ئومێد سه‌باح سه‌رۆكێ دیوانا جڤاتا وه‌زیران، فارس عیسا سه‌رۆكێ نوونه‌رایه‌تییا حكومه‌تا هه‌رێما كوردستانێ ل به‌غدا، جووتیار عادل په‌یڤدارێ حكومه‌تا هه‌رێما كوردستانێ.