ئالا فەوزی فەتاح
رۆژێن هەوا بەرهنگاربوونا توندوتیژیا دژی ژنان ل سەرانسەری جیهانێ ب رۆژێن گرنگ دهێنە دانان، ژ بەركو ئەڤ رۆژە وەها هاتییە پێناسەكرن كو جیهان دێ د ناڤا رۆژێن هشیاركرنێ و ئەنجامدانا چالاكییاندا بوریت بۆ هشیاركرنا خەلكێ و بەلاڤكرنا رەوشەنبیرییا نەهێلانا توندوتیژییا دژی ژنان.
سیمبۆلا ئەڤان رۆژان ژی ئەنگێ پرتەقالی بوو، لەورا ژی زۆرجاران ب رۆژێن پرتەقالێ دهێت ناڤكرن.
هەرسال ل 25ێ هەیڤ تشرینا دووێ هەوا بەرهنگاربوونا توندوتیژییا دژی ژنان دەست پێدكەت و ل 10ی كانوونا ئێكێ یا هەمان سالێ ئەو هەوە ب دووماهی دهێن. لێ ئەگەر ب تنێ چالاكی د ئەڤی ماوەیدا بهێنە سنورداركرن، ب راستی هیچ رامانا خوە نامینیت، ژبەر هندێ گرنگە هەمی رۆژێن سالێ، رۆژێن پرتەقالی بن و جیهان ل سەر كەیسێن گرێدای ب مافێن ژنان چالاكییان بكەن.
ل سەرانسەری جیهانێ، چالاكی، پانێل و سمینار، كۆنفرانس و فەستیڤال دهێنە سالزكرن و د ناڤا وان چالاكییاندا چەندین ڤەكۆلین و داتا دهێنە پێشكێشكرن و فۆكسێ دئێخنە سەر رەوشا ژنان ل سەر ئاستێ جیهانێ، لەورا د ئەڤان رۆژاندا گەلەك داتا و زانیاریان ل دۆر وان وەلاتان بەلاڤ دبن كو ژن تێدا ئازاد نینن و ل بن گەفان دانە.
ئەگەر تەماشەی كوردستانێ وئەڤێ دەڤەرێ بكەین، رەنگە ب زمانێ داتایان ئەم بگەهینە ئەوێ راستیێ كو بەلێ توندوتیژی ل هەمبەری ژنان دهێتە كرن، لێ ناهێتە ڤەشارتن ژی كو یاسایێن كارپێكریێن ئەڤی وەلاتی ب توندی ل دژی ئەوان كەسان رادبیت كو ل هەمبەر ژنان توندوتیژن. هەروەسا ل دۆر كەلتورێ رێزگرتن و ئێكسانییا ناڤبەرا ژن و زەلاماندا ل ڤێ دەڤەرێ ئەم ئاماژەیێن دلخوشكەر دبینین، چونكی نوكە ب دەهان ژن د پۆستێن بلندێن ڤی وەلاتی دا دهێنە دیتن ەو دشێن ببمە ئاماژەیەك كو بەلێ ژن هەنە و ژن دشێن ئەركێ ریڤەبرنا وەلاتی ببینن، ل جهێن بریارێ ژنان وجودا خوە هەیە، د ناڤا خواندنگەهاندا گرنگی ب بەهرە و شیانان ژنان دهێتە دان و هەمی دەمان بزاڤ دهێنە كرن دەلیڤەیێن باشتر ب ژنان بهێتە دان ژ بۆی كو ئەو بهێنە پێش و رۆلێ خوە د ئەڤی جڤاكیدا ببینن. كەواتە ب گشتی ئەم دشێین بێژین د ناڤبەر كەلتوورێ توندوتیژیێ و كەلتورێ رێزگرتنێ ل شیانێن ژنان، ئەم دبینین كەلتورێ دووێ پتر گەشێ دكەت، لێ هەرچەندە یا توندوتیژیێ ناهێتە ژناڤبرن وەكو ئەم ل هەمی جیهانێ دبینین، لێ نەهێلانا كەلتورێ زەلامساریێ بخوە دەستكەڤتەكە ئەگەر ب رەنگەكێ بەرچاڤتر كار ل سەر بهێتە كرن و چالاكڤان و رێكخراوێن بیاڤێ ژنان چالاكییێن خوە د وی بیاڤیدا خورت بكەن.
