ئه‌ڤرۆ 14ى كانوونا ئێكێ یا 2022ێ نێچیرڤان بارزانى سه‌رۆكێ هه‌رێما كوردستانێ ل هه‌ولێرێ دگه‌ل ئالینا رومانۆسكى بالیۆزا ئه‌مریكا ل عیراقێ كۆمبوو.
دكۆمبوونا ئه‌واندا دووماهى سه‌ره‌دانا سه‌رۆك نێچیرڤان بارزانى بۆ به‌غدا و دیدار و كۆمبوونێن وى دگه‌ل به‌رپرسێن بلند یێن وه‌لاتى، كارنامه‌یا حكومه‌تا فیدرالى یا عیراقێ، كاركرن بۆ مۆكۆمكرنا په‌یوه‌ندییێن هه‌ولێر – به‌غدا و چاره‌سه‌ركرنا ئاریشه‌یێن دگه‌ل هه‌رێما كوردستانێ ل سه‌ر بنه‌مایێن ده‌ستوورى و سیسته‌مێ فیدرالى، دانوستاندن و سه‌ره‌دانێن به‌رده‌وام یێن هه‌ولێر و به‌غدا بۆ درووستبوونا تێگه‌هشتنا هه‌ڤپشك هاتنه گوتوبێژكرن.
هه‌ردوو لایان دووپاتى ل كارێ هه‌ڤپشك یێ دناڤبه‌را هه‌ولێر و به‌غدا دا و لایه‌نێن سیاسى یێن وه‌لاتى ب گشتى كر، و ل سه‌ر گرنگییا پشته‌ڤانیكرنا سه‌رۆكوه‌زیران و كابینه‌یا نوو یا حكومه‌تا فیدرالییا عیراقێ دهه‌ڤرابوون، ره‌وشا نوكه‌ژى ب ده‌رفه‌ته‌ك بۆ چاره‌سه‌ركرنا ئاریشه‌یێن عیراقێ و بجهئینانا كارنامه‌یا حكومه‌تێ دیت، هه‌روه‌سا گرنگرییا بجهئینانا رێككه‌ڤتنا حكومه‌تا هه‌رێما كوردستانێ و حكومه‌تا فیدرالییا عیراقێ بۆ ئاسایكرنا ره‌وشا شنگالێ و ڤه‌گه‌راندنا ئاواره‌یان ب پێدڤى و گرنگ ل قه‌له‌مدا.
سه‌رۆك نێچیرڤان بارزانى دووپاتكر، گرنگه تێگه‌هشتن و ره‌وانگه‌یه‌كا هه‌ڤپشك بۆ چه‌وانییا برێڤه‌برنا وه‌لاتى و برێڤه‌برنا سامان و ده‌وله‌مه‌ندییێن عراقێ هه‌بیت، و ب جۆره‌كێ وه‌سا بیت كو كار و خزمه‌تگوزارییێن باشتر بۆ وه‌لاتییان بهێنه دابینكرن و ببیته ئه‌گه‌رێ ئارامى و سه‌قامگێری و پاراستنا سه‌روه‌رییا وه‌لاتى.
گرنگییا پاراستنا ئارامى و سنۆران و كاركرنا هه‌ڤپشك یا هه‌ولێر و به‌غدا ل سه‌ر ئه‌ڤى بابه‌تى، هه‌مه‌جووركرنا ژێده‌رێن وزێ، هاندانا سه‌رمایه‌دار و وه‌به‌رهێنانێن بیانى ل عیراق و هه‌رێما كوردستانێ، پرۆسه‌یا رێكخستنا پێشمه‌رگه‌ى، په‌یوه‌ندییێن عیراقێ دگه‌ل وه‌لاتێن جیران و ده‌ڤه‌رێ ته‌وه‌ره‌كێ دییێ كۆمبوونێ بوو.
