پەیڤدارێ وەزارەتا بەرگرییا ئەمریكا ل دۆر هێرشێن چەند رۆژێن بووری یێن چەكدارێن داعشێ ل سنۆرێ كەركووكێ راگەهاند، ئەو هێرشە وێ راستیێ دیاردكەن كو پێدڤییە هەماهەنگییا ئەمریكا دگەل هێزێن عیراقێ بۆ رووبرووبوونا چەكدارێن داعشێ ل سەر وەلاتی یا بەردەوام بیت.
جەنەرال پات رایدەر، پەیڤدارێ پنتاگۆنێ د پرێس كۆنفرانسەكی دا دیاركر، ئەمریكا پەیوەندییەكا بهێز دگەل عیراقێ هەیە ب تایبەتی د شەرێ دژی داعشێ دا، ئەڤە ژی وێ گرنگییێ دیاردكەت كو پێدڤییە پێكڤە ل دەڤەرێ كاربكەین و رووبروو هەر هێرشەكێ ببین كو داعش درۆست دكەت.
ئاشكەرا ژی كر، هەرچەندە ئەو ل سەر هویركاتییێن هێرشێن داعشێ یێن بەری چەند رۆژان ل سنۆرێ كەركووكێ نە یێ ئاگەهدارە، لێ ئەمریكا ل سەر رۆلێ شیرەتكاری و هاریكاریكرن و مەشقكرنا هێزێن عیراقێ ب مەبەستا بهێزكرنا شیانێن وان بۆ رووبرووبوونا وان هێرشان، بەردەوامە.
