سه‌رۆكێ حكومه‌تا هه‌رێما كوردستانێ په‌یامه‌ك ل دۆر هێرشكرنا ل سه‌ر كچا سلێمانییێ به‌لاڤكر و راگه‌هاند، وى هه‌ردوو وه‌زیرێن ناڤخۆ و داد راسپاردینه لێكۆلینێ ل دۆر وێ روودانێ بكه‌ن و ئه‌وێن ده‌ست تێدا هه‌ى سزابده‌ن.
مه‌سرور بارزانى سه‌رۆكێ حكومه‌تا هه‌رێما كوردستانێ په‌یامه‌ك ل دۆر هێرشكرنا ل سه‌ر كچه‌كێ ل ده‌ڤه‌را هوانه یا باژێرێ سلێمانییێ ل سه‌ر ئه‌كاونتێ خوه یێ تویته‌رى به‌لاڤكر، و ئه‌و روودانه ب شه‌رمزارانه هژمارت.
سه‌رۆكێ حكومه‌تێ دپه‌یاما خوه‌دا دیاركر، هێرشكرنا ب كۆم ل سه‌ر كچه‌كا گه‌نج ل ده‌مه‌كى بوو كو یا پێدڤى بوو ئاهه‌نگێن سه‌رێ سالێ هاتبانه‌كرن، ژبلى كو هێرشه‌كا شه‌رمزارانه‌یه، چ بهانه بۆ نینن ب چ شێوه‌یان ناهێته قه‌بوولكرن.
هه‌روه‌سا مه‌سرور بارزانى ئاماژه ب هندێ كر، دگه‌ل هه‌ردوو وه‌زیرێن ناڤخۆ و داد یێن حكومه‌تا هه‌رێما كوردستانێ ئاخڤتییه بۆ ده‌ستپێكرنا لێكۆلینان ل سه‌ر وێ روودانێ و سزادانا ئه‌وان كه‌سێن ده‌ست دوێ تاوانێدا هه‌ی.
