سه‌رۆكێ حكومه‌تا هه‌رێما كوردستانێ ب هه‌لكه‌ڤتا هاتنا سالا نوو یا زایینى په‌یامه‌كا پیرۆزباهییێ به‌لاڤكر و راگه‌هاند، هیڤیداره سالا نوو دووماهییێ ب نه‌خۆشى و په‌تا و قه‌یرانانا بینیت.
مه‌سرور بارزانى سه‌رۆكێ حكومه‌تا هه‌رێما كوردستانێ دیاركر: ب هه‌لكه‌ڤتا هاتنا سالا نوو یا زایینى 2023ێ، پیروزباهییێ ل هه‌موو نیشتیمانیێن هه‌رێما كوردستانێ، ب تایبه‌تى پێشمه‌رگه‌یێن قاره‌مان و هێزێن ئاسایشا ناڤخۆ و بنه‌مال و كه‌سوكارێن سه‌ربلندێن شه‌هیدان، هه‌روه‌سا گه‌لێن عیراق و جیهانێ دكه‌ت، هیڤییا وى ئه‌وه سالا نوو، سالا خۆشگوزه‌رانى و پێشكه‌ڤتن و گه‌شه‌پێدانا زێده‌تر یا كوردستانێ بیت.
سه‌رۆكێ حكومه‌تێ ئاماژه ب هندێ دا، سه‌ربارى سنۆردارییا شیانێن به‌رده‌ستێ حكومه‌تا هه‌رێما كوردستانێ، ل سالا بوورى شیان ب هاریكارییا كه‌رتێ تایبه‌ت چه‌ندین پرۆژه‌یێن جۆره‌وجۆر ل باژێرێن كوردستانێ د بیاڤێن رێك و بانان و چاندن و پیشه‌سازى و دیجیتالكرنا خزمه‌تگوزارییاندا بجهبینن، ئه‌ڤه ژبلى هندێ ل سالا بوورى د بیاڤێن دیپلۆماسى و پێشڤه‌برنا په‌یوه‌ندییان دگه‌ل وه‌لاتێن عه‌ره‌بى و ده‌ڤه‌رێ و ئورۆپادا ساله‌كا به‌رهه‌مداربوو.
مه‌سرور بارزانى دپه‌یاما خوه‌دا به‌حسى هندێ ژى كر، ب مخابنیڤه ل سالا بوورى رووبروو چه‌ندین هێرشان بوون، د ده‌مه‌كیدا هه‌رێما كوردستانێ وه‌كو هه‌ر جار فاكته‌ره‌كێ ئارامى و سه‌قامگێرییێ ل عیراق و ده‌ڤه‌رێ بوو، و چ ده‌مان نه‌بوویه گه‌ف بۆ چ لایه‌نان، له‌وما هیڤییا وان ئه‌وه ل سالا بهێت، ئاسایش و سه‌قامگێرییا هه‌رێما كوردستان و عیراق و ده‌ڤه‌رێ ب گشتى یا پاراستى و جێگیر بیت، و ئاریشه‌یێن دناڤبه‌را هه‌رێما كوردستان و عیراقێدا ل سه‌ر بنه‌مایێن ده‌ستوورى و ب شێوه‌یه‌كێ بنه‌ره‌تى چاره‌سه‌ر ببن، داكو ب هاریكارییا هه‌موو لایه‌نان بشێن درێژییێ ب پرۆسه‌یا چاكسازى و خزمه‌تكرنا زێده‌تر یا خه‌لكێ كوردستانێ بده‌ن، ب هیڤییا هندێ هه‌موو لایه‌ن به‌رژه‌وه‌ندییا نیشتیمانى ل سه‌ر هه‌موو به‌رژه‌وه‌ندییێن دى بێخن و رێزێ ل سه‌روه‌رییا قانوونێ بگرن.
سه‌رۆكێ حكومه‌تا هه‌رێما كوردستانێ گوت ژى: ئومێده‌واره سالا نوو، سالا بدووماهى هاتنا نه‌خۆشى و په‌تا و قه‌یرانان و به‌رده‌ستبوونا ئاشتى و ئاسووده‌یێ بۆ مرۆڤایه‌تییێ ب گشتى بیت، سالا نوو ل هه‌موویان پیرۆز بیت و خۆدایێ مه‌زن كوردستانێ بپارێزیت.
