ئاژانسا خانی، تایبەت:
ئەندامەكێ پەرلەمانێ عیراقێ ژ فراكسیۆنا پارتی بۆ ئاژانسا خانی گۆت: بریارا تاپۆكرنا خانییێن كۆمەلگەهێن شنگالێ ژلایێ جڤاتا وەزیران ڤە هاتییە دەركرن، لێ هەتا نوكە لیژنەیێن جێبەجێكرنێ نەهاتینە پێكئینان.
دكتۆر ماجد شنگالی، ئەندامێ پەرلەمانێ عیراقی ژ فراكسیۆنا پارتی ئاشكەراكر، ل سالا 1975ێ وەك بزاڤەك ژبۆ تەعریبكرنا دەڤەرێ ژلایێ رژێما بەعس ڤە، خەلكێ گۆندێن دەوروبەرێن شنگالێ ژ جهێن وان هاتبوونە ڤەگۆهاستن و د 13 كۆمەلگەهاندا هاتبوونە ئاكنجیكرن، لێ هەتا نوكە ئەو كۆمەلگەهـ نەهاتینە تاپۆكرن.
ناڤبری گۆت ژی: پشتی سالا 2003ێ، بزاڤێن جددی ژلایێ حزبێن كوردی ب تایبەت پارتی دیمۆكراتی كوردستان ڤە هاتنەكرن ژبۆ تاپۆكرنا وان، پشتی هاتنا داعشێ ل سالا 2014ێ تا رادەیەكی هاتبوونە راوەستاندن، لێ پشتی رزگاركرنا شنگالێ ژلایێ پێشمەرگەی ڤە، رێكخراوێن جڤاكێ سڤیل و ئەندامێن پارتی پرۆژەك ژبۆ تاپۆكرنا وان كۆمەلگەهان پێشكێشی جڤانا نوینەرێن عیراقێ كر و بریارا تاپۆكرنێ ژلایێ جڤاتێ ڤە هاتە دەركرن.
دیار ژی كر، هەژمارا خانییان ل هەر 13 كۆمەلگەهان زێدەترە ژ 50 هزار خانییان، پێدڤییە پارێزگەها مووسل دەست ب رێكاران بكەت ژبۆ دەستپێكرنا پرۆسەیا تاپۆكرنێ.
