شیرەتکارەکێ سەرۆکێ حوکمەتێ: بریارێن دادگەھا شۆره‌شێ دێ ھێنە ھەلوەشاندن

ئاژانسا خانی ، تایبەت:

بەغدا و ھەرێم لدۆر ئاسایی کرنا رەوشا دەڤەرێن کوردستانی گەھشتینە رێکكەفتنێ و شیرەتکارەکێ سەرۆکێ حوکمەتێ ژی ئاشکرا کر، بڕیارە ھەموو ئەو بڕیارێن ل سەر دەمێ دادگەھا شۆڕه‌شێ یا بەعسییان بھێنە ھەلوەشاندن و ئەردێ کوردان بھێتە ڤەگەڕاندن.

دژوار فایەق، شیرەتکارێ سەرۆکێ حوکمەتا ھەرێما کوردستانێ بۆ ئاژانسا خانی دیارکر” د سەرەدانا خوە دا بۆ بەغدا مەسرور بارزانی تەکەز لسەر بجهئینانا کارناما حوکمەتا عێراقێ کرییە، ب تایبەتی ئەو خالێن گرێدایی دەڤەرێن سنورێ مادێ ١٤٠” ژوان ژی ھەلوەشاندنا بڕیارێن دادگەھا بناڤێ شۆره‌شێ، کو ب فەرمانێن وێ دادگەھێ ئەردێ چەندین جۆتیارێن کورد ھاتییە ڤەگوھاستن بۆسەر ناڤێن وەلاتیێن عەرەب و نوکە وەلاتیێن عەرەب بەرھەڤ نینن بۆ رادەستکرنا ئەردێ وەلاتیێن کورد، ئەڤە ژی بوویە ئەگەرێ داگیرکاریەکا زۆر ل دەڤەرێن کوردستانی یێن دەرڤەیی ئیدارا حوکمەتا ھەرێما کوردستانێ.

ناڤهاتی گۆت ژی” ھەرێما کوردستانێ یا رژدە ل سەر ھەلوەشاندنا ھەموو وان بڕیارێن دادگەھا بناڤێ شۆڕه‌شێ یا سەردەمێ بەعسیان، چونکی بووینە ئەگەرێ داگیرکرنا ئەردێ کوردان و لدووڤ دستووری ژی نابیت کار ب بڕیارێن وێ دادگەھێ بھێنە کرن، بڕیارە د دەمێ شەش ھەیڤاندا بڕیارێن وێ دادگەھێ ھەموو بھێنە ھەلوەشاندن، ئەڤە ژی دێ بیتە ئەگەرەک بۆ ڤەگەڕاندنا رووبەرەکێ زۆر یێ ئەردێ کوردان و دەرکرنا عەرەبێن شۆفینی .