مەسرور بارزانی سەرۆکێ حکومەتێ پەیامەك ل دۆر رەوشا هەرێما كوردستانێ بەلاڤكرن و راگەهاند: ئەز ب ئێکسانی تەماشەی هەمی دەڤەرێن هەرێما کوردستانێ دکەم، خوە ب بەرپرسیار دزانم بەرامبەر ب هەمی خەلکێ هەرێمێ ل هەمی پارێزگەهـ و ئیدارەیێن سەر بەخۆ، بەلێ ب مخابنیڤە ڕێگری هاتییە کرن و ئاستەنگی بۆ حکومەتا هەرێمێ هاتینە دروستکرن، ئەڤەژی زیان ب ژیارا وەلاتییێن مە گەهاندینە.
هەروەسا گۆت: نابیت لایەنێن سیاسی پشکداری حکومەتێ بن و ڕۆلێ ئۆپۆزسیۆنێ بگێڕن، دڤێت جێبەجێکارێ ئەجندایا حکومی بن، نابیت کێشە و ئالۆزییێن سیاسی ڤەگۆهێزنە ناڤ حکومەتێ دا.
مەسرور بارزانی خویاكر: پێدڤییە دەستپێکێ تۆمەتبارێن کەیسێ تیرۆرکرنا هاوکار جاف بهێنە ڕادەستکرن پاشی لژنەیەکا هەڤبەش ژ دامودەزگەهێن پەیوەندیدار و پەرلەمان و لایەنێن نێڤدەولەتی و هەر ولاتەکێ کو بخازیت پشکدار بیت، بهێتە پێکئینان.
دیاركرژی، بۆ دەمێ دوو سالانە ئاریشا کۆمکرنا داهاتی و نەمانا پارەی ل بانکێن سنورێ سلێمانی و گەرمیان و هەلەبجە و ڕاپەرین هەیە، کو هندەک کەس و لایەن ژ بۆ بەرژەوەندییێن خوە مایتێکرنێ د پرۆسەیا کۆمکرنا داهاتێن وی سنوری دکەن، لەورا ئەو کەس و لایەن بەرپرسیارن بەرامبەر وان زیانێن ب وەلاتییان و سازییێن حکومەتێ دکەڤن.
سەرۆکێ حکومەتێ گۆت ژی: دەمەکە ژ لایێ دامودەزگەهێن ئێکەتییا نشتیمانییا کوردستانێڤە، کە هەڤپشکێ سەرەکییێ ئەڤێ کابینێ یە، وەسا باس دکەن کو دۆرپێچ ل سەر سنورێ سلێمانییێ هەیە، هەمی شارەزایێن رەوشا هەرێمێ دزانن کو داهاتێ پەترۆلێ، هەروەسا ئەو پشکا بۆدجەی کو دەم بۆ دەمی ل بەغدایێ هاتی، ب شێوەیەکێ یەکسان هاتییە دابەشکرن و موچەیی کارمەندان پێ هاتییە دان، ئەوا کو جهێ راوەستیانێ بوویە، داهاتێ “نە نەفتی” کو بەشەکێ زۆرێ وی داهاتی ل دەروازەیێن سنورینە، بەلێ ب مخابنیڤە د ڤی بیاڤیدا ڕێک نەهاتییە دان ل سنورێ سلێمانی و گەرمیان و هەلەبجە و ڕاپەرین بهێنە ڕێکخستن.
