سهرۆك بارزانى ل پیرمامێ پێشوازى ل ئیریك شۆڤالییێ بالیۆزێ فرهنسا ل عیراقێ و مارتین یێگهر بالیۆزێ ئهلمانیا ل عیراقێ كر.
ل دهستپێكا كۆمبوونێ بالیۆزێن ههردوو وهلاتان دیاركرن، فرهنسا و ئهلمانیا ب ههڤپشكییا ئێك و دوو پویتهى ب بابهتێن نێڤدهولهتى یێن گرنگ ب تایبهتى رهوشا عیراق و ههرێما كوردستانێ ددهن، و سهقامگێرییا ههرێما كوردستانێ گرنگییهكا تایبهت ل دهڤ ههردوو وهلاتان ههیه، ههروهسا ئاشكراكرن، فرهنسا و ئهلمانیا نیاز ههنه سهنتهرهكێ ههڤپشكێ كولتوورى ل كهلا ههولێرێ ب دامهزرینن، ئهوژى ب مهرهما پێشخستنا پهیوهندییێن كولتوورى و زانستى و مللى دناڤبهرا ههرێما كوردستانێ و ههردوو وهلاتێن ئهلمانیا و فرهنسادا.
دههمان كۆمبووندا سهرۆك بارزانى خۆشحالییا خوه ب ههماههنگى و ههڤپشكییا دناڤبهرا ئهلمانیا و فرهنسادا ل گرنگیدانا وان ب بابهتێن نێڤدهولهتى دیاركر، و ب بابهتهكێ گرنگ و كاریگهر ل قهلهمدا، سهرۆك بارزانى پێزانین بۆ بریارا پهرلهمانێ ئهلمانیا یا جینۆساید ناساندنا كۆمهلكۆژییا شنگالێ ههبوون، و ب پێنگاڤهكا گرنگ و مێژوویى زانى، و داخواز كر، بۆ بدهستڤهئینانا دادپهروهرییێ و ساخكرنا برینێن خووشك و برایێن ئێزیدى وهلاتێن دى یێن ئێكهتییا ئورۆپا بریارێن ب ڤى شێوهیى بدهن.
ههر دوێ دیدارێدا رهوشا سیاسییا دهڤهرێ و دووماهى پێشهاتێن ناڤ پرۆسهیا سیاسییا عیراقێ هاتنه گوتوبێژكرن، و شاندێ مێڤان خۆشحالییا خوه بۆ وى سهقایێ دناڤبهرا ههرێما كوردستانێ و حكومهتا فیدرالدا ههیى نیشاندا، و ب دهرفهتهك بۆ چارهسهركرنا ئاریشهیێن ههولێر و بهغدا دیت.
رهوشا سیاسییا ههرێما كوردستانێ تهوهرهكێ دییێ دیدارێ بوو، و شاندێ مێڤان دووپاتكر، فرهنسا و ئهلمانیا دێ ل سهر پشتهڤانیكرن و ههڤپشكى و ههماههنگییا دگهل ههرێما كوردستانێ دبهردهوامبن.
