ئه‌ڤرۆ ئێكشه‌مبی 2023/1/22 ێ” نێچيرڤان بارزانى، سه‌رۆكێ هه‌رێما كوردستانێ پێشوازى ل ئيريك شۆڤاليێ باليۆزێ فره‌نسا و مارتين يێگه‌ر باڵيۆزێ ئه‌ڵمانيا ل عێراق و شاندێ ل گه‌ل دا كر.
د كۆمبوونه‌كێ دا په‌يوه‌ندی یێن هه‌رێما كوردستانێ ل گه‌ل فره‌نسا و ئه‌ڵمانيا، ره‌وشا ناڤخۆیا هه‌رێما كوردستانێ، ره‌وشا عێراقێ و كارناما حكومه‌تا فيدراڵى، په‌يوه‌ندی یێن هه‌ولێر ـ به‌غدا و بزاڤێن چاره‌سه‌ركرنا كێشێن دناڤبه‌را، پرسا وزێ و شییان و پێگه‌هێ هه‌رێما كوردستانێ د وی بیاڤی دا، خستنه به‌ر به‌حس و گوتۆبێژان.
باليۆزێن ئه‌ڵمانيا و فره‌نسا كورتییه‌ك ده‌رباره‌یى پرۆژێ دانانا په‌يمانگه‌ها داهاتییا كولتووری یا هه‌ڤپشك یا فره‌نسى ـ ئه‌ڵمانى ل هه‌ولێرێ ل سالیادا شێست سالێن په‌يمانا ئه‌ليزێ یا دۆستايه‌تییا فره‌نسا و ئه‌لمانيا دا پێشكێش كر، هه‌روه‌سا ته‌كه‌زی ل خواستا وه‌لاتییان بۆ پێشخستنا په‌يوه‌ندييان ل گه‌ل هه‌رێما كوردستانێ ل هه‌موو بیاڤان دا كر، ب تايبه‌تی د بیاڤێ كولتووری دا.
نێچيرڤان بارزانى، سوپاس و پێزانينێن هه‌رێما كوردستانێ بۆ فره‌نسا و ئه‌ڵمانيا ته‌كه‌ز كرن بۆ هاریكاری یێن وان د بیاڤێن سياسى، له‌شكه‌رى، ئابوورى، مرۆڤى و كولتووری، هه‌روه‌سا زێده‌باری خۆشحاڵى و ده‌ستخۆشىییێ، دانانا به‌رێ بنیاتێ په‌يمانگه‌ها داهاتییا كولتووريیا هه‌ڤپشكا فره‌نسى ـ ئه‌ڵمانى ل هه‌ولێرێ ب گاڤه‌كا گرنگا پیشخستنێ یا په‌يوه‌ندی یێن كولتووری یێن فره‌نسا و ئه‌ڵمانيا ل گه‌ڵ هه‌رێما كوردستانێ ل قه‌ڵه‌م دا.
په‌يوه‌ندی یێن عێراقێ و هه‌رێما كوردستانێ ل گه‌ل وه‌لاتێن جیران و ڤێ ده‌ڤه‌رێ، داوی پێشهاتێن ڤێ ده‌ڤه‌رێ ب گشتى و چه‌ند پرسێن دیتر، ته‌وه‌ره‌كێ دی یێ وێ كۆمبوونێ بوو.
