مه‌سرور بارزانى پێشوازى ل وه‌زیرێ ده‌وله‌تێ یێ ئه‌لمانیا كر

سه‌رۆكێ حكومه‌تا هه‌رێما كوردستانێ پێشوازى ل وه‌زیرێ ده‌وله‌تێ یێ ئه‌لمانیا ل وه‌زاره‌تا ده‌رڤه‌ یا ئه‌لمانیا و شاندێ دگه‌لدا كر.

سه‌رۆكێ حكومه‌تا هه‌رێما كوردستانێ مه‌سرور بارزانى پێشوازى ل وه‌زیرێ ده‌وله‌تێ یێ ئه‌لمانیا ل وه‌زاره‌تا ده‌رڤه‌ یا ئه‌لمانیا و شاندێ دگه‌لدا كر، و وه‌زیرێ ده‌وله‌تێ ژ وه‌زاره‌تا ده‌رڤه‌ یا ئه‌لمانیا كورتییه‌ك ده‌رباره‌ى ئارمانجێن سه‌ره‌دانا خوه‌ بۆ هه‌رێما كوردستانێ روونكر، ئاماژه‌ ب په‌یوه‌ندییا ب هێز یا دناڤبه‌را هه‌رێما كوردستانێ و ئه‌لمانیادا كر، و حه‌زا وه‌لاتێ خوه‌ بۆ پێشڤه‌برنا په‌یوه‌ندییان دگه‌ل هه‌رێمێ د هه‌موو بیاڤاندا ب تایبه‌تى دبیاڤێن ئابوورى و لێكگهۆرینێن بازرگانیدا دیاركر، هه‌روه‌سا به‌حس ل هندێ كر، بریاره‌ شانده‌كێ بلند یێ وه‌به‌رهێنه‌ر و خودان كار و بازرگانێن ئه‌لمانیا ل ده‌مێن بهێن سه‌ره‌دانا هه‌رێما كوردستانێ بكه‌ن ب مه‌ره‌ما پێشڤه‌برنا په‌یوه‌ندییێن دوو لایانه‌.

ژلایێ خۆڤه‌ سه‌رۆكێ حكومه‌تا هه‌رێما كوردستانێ سوپاسییا ئه‌لمانیا بۆ پشته‌ڤانییا وێ یا به‌رده‌وام ل هه‌رێما كوردستانێ ب تایبه‌تى ل شه‌رێ دژى تیرۆرێ و ژ چارچووڤێ هه‌ڤپه‌یمانییا نێڤده‌وله‌تییا دژى داعشێ كر، و پێزانینێن هه‌رێما كوردستانێ بۆ په‌رله‌مانێ ئه‌لمانیا ل دۆر بریارا ب جینۆساید ناساندنا كۆمه‌لكۆژییا ئێزدییان ده‌ربرین، هه‌روه‌سا سوپاسییا ئه‌لمانیا ل سه‌ر پشته‌ڤانیكرنا وێ بۆ چاكسازییێن كابینه‌یا نه‌هێ ب تایبه‌تێ دبیاڤێن دیجیتالكرنا خزمه‌تگوزارییێن گشتیدا كر.

ته‌وه‌ره‌كێ دییێ كۆمبوونێ یێ تایبه‌ت بوو ب په‌یوه‌ندییێن دناڤبه‌را هه‌رێما كوردستانێ و حكومه‌تا فیدرالدا، دڤى بیاڤیدا مه‌سرور بارزانى حه‌زا هه‌رێما كوردستانێ بۆ چاره‌سه‌ركرنا ئاریشه‌یان ب شێوه‌یه‌كێ بنه‌ره‌تى و ل سه‌ر بنه‌مایێن ده‌ستوورى دووپاتكر و ئاماژه‌ ب هندێ دا، دووماهى بریارا دادگه‌ها بلندا فیدرالى بۆ رێگرتنێ ژ هنارتنا به‌شه‌ك ژ شایسته‌یێن دارایى یێن هه‌رێما كوردستانێ، بزاڤه‌كا دى یا نه‌ره‌وایا ئه‌ڤێ دادگه‌هێ یه‌ بۆ تێكدانا ئه‌وان ده‌رفه‌تێن نوو یێن بۆ چاره‌سه‌ركرنا ئاریشه‌یان و ئه‌وى سه‌قایێ ئه‌رێنى یێ كو پشتى سه‌ره‌دانا شاندێ بلندێ حكومه‌تێ بۆ به‌غدا درووست بووى.

هه‌روه‌سا مه‌سرور بارزانى ئاشكراكر، ل دووڤ رێككه‌ڤتنێ لایه‌نێن پێكهێنه‌رێن حكومه‌تێ و كارنامه‌یا كابینه‌یا نوو یا عیراقێ، پێدڤییه‌ دماوێ شه‌ش هه‌یڤاندا پشتى ده‌ستبكاربوونا حكومه‌تا عیراقێ، هه‌ردوو پرۆژه‌یێن دادگه‌ها بلندا فیدرالى و جڤاتا ئیتیحادى ده‌ركه‌ڤن، ژبه‌ركو پێنگاڤ و ره‌فتارێن نوكه‌ یێن دادگه‌ها فیدرال، ب مخابنیڤه‌ دێ ئاریشان به‌رده‌م گه‌هشتن ب رێككه‌ڤتنێ و چاره‌سه‌ركرنا ئاریشه‌یێن دناڤبه‌را هه‌رێما كوردستانێ و حكومه‌تا فیدرالدا درووستكه‌ن.