د. خالد حه‌یده‌ر: لادانا پارێزگارێ بانکا ناڤەندی کاریگەری ل سەر بھایێ دۆلاری نابیت

ئاژانسا خانی ، تایبەت:

بسپۆرەکێ ئابووری رەتکر لادانا پارێزگارێ بانکا ناڤەندی کاریگەری  ل سەر بھایێ دۆلاری ھەبیت و دبێژیت، لادانا پارێزگارێ بانکا ناڤەندی زێدەتر بابەکێ سیاسی بوویە.

د. خالد حەیدەر، سەرۆکێ مونتەدا ئابووریا کوردستانێ بۆ ئاژانسا خانی دیارکر” ئەگەرێن بلندبوونا بھایێ دۆلاری د زۆرن، بەلێ دو ئەگەرێن سەرەکی ھەنە ئێک ژ وان ڤەگوھاستنا دۆلاريیە ژ عێراقێ بۆ ئیرانێ ئەگەرێ دویێ بۆ بڕیارێن وەزارەتا خەزینا ئەمریکا ڤەدگەڕیت، کو ئەمریکا ھندەک رێكارێن دژوار داناینە بۆ ھنارتنا دۆلاری و نوکە دۆلارێ کێمتر دھێتە بانکا ناڤەندییا عێراقێ، کێم بوونا دۆلاری خواست زێدەکرییە و بھایێ دۆلاری بلندکریە.

ناڤهاتی گۆت ژی” لادانا پارێزگارێ بانکا ناڤەندی چو کاریگەری ل سەر بھایێ دۆلاری نابن، چونکی ھەر کەسەکێ ببیتە پارێزگارێ بانکا ناڤەندی دێ ھەمان دەستھەلاتێن پارێزگارێ بەرێ ھەبن و لادانا پارێزگارێ بانکێ زێدەتر بابەتەکێ سیاسییە، بەلێ خۆنیشاندانێن وەلاتیێن عێراقێ دێ کاریگەری ھەبیت لسەر ڤێ چەندێ و سەرۆک وەزیرێن عێراقێ لەزێ بکەت بۆ ئەنجامدانا سەرەدانا خوە یاکو بڕیارە بچیتە ئەمریکا، ئەگەر بھێت و بھایێ دۆلاری ھەر بلند بمینیت ئەز بدوور نابینم شۆره‌شا برسییا ل عێراقێ سەرھەلبدەت و حوکمەتا نوکە یا عێراقێ ژناڤ ببەت.