ئیران دێ هنارتنا گازێ بۆ عیراقێ ڕاگریت

ئەڤرۆ ئیک شەمبی 29 کانوونا دووێ 2023 وەزارەتا کارەبێ یا عیراقێ ڕاگەهاند، ئیران دێ بۆ دەمێ 12 ڕۆژان هنارتنا گازێ بۆ عیراقێ ڕاگریت، ئەڤێ چەندێ ژی ئاریشە بۆ بەلاڤکرنا کارەبێ دروستکریە.

د ڕاگەهاندنەکێ دا وەزارەتا کارەبێ یا عیراقێ ڕاگەهاندیە، ب مەرەما سەخبێرکرنا بۆڕیا ڤەگۆهاستنا گازێ، هنارتنا گازێ ژ لایێ ئیرانێ ڤە بۆ عیراقێ دێ بۆ دەمێ 12 ڕۆژان هێتە ڕاگرتن.

دیارکریە ژی، ڕاگرتنا گازێ ژ لایێ ئیرانێ ڤە بویە ئەگەرێ ژ دەستدانا 7 هزار و 500 مێگاواتێن کارەبێ ل بەغدا، دەڤەرێن ناڤەڕاست و ناڤەڕاستا فۆرات، ڤێ چەندێ ژی وەکریە دەمژمێرێن پێدانا کارەبێ کێم ببن.

ئاماژەکریە ژی: ل ڕۆژا پێنج شەمبی 26 کانوونا دووێ 2023 هنارتنا گازێ ژ لایێ ئیرانێ ڤە هاتیە ڕاگرتن و دێ بۆ دەمێ 12 ڕۆژان یا بەردەوام بیت.

وەزارەتا کارەبێ یا عیراقێ داخواز ژ وەلاتییان دکەت تێگەهشتن بۆ بابەتی هەبیت و هاریکار بن بۆ دەربازکرنا وێ قەیرانا تووشبووین.