محەمەد گڤاری
ل سالا 1945 دەولەتا ئەلمانیا ب سەرپەرشتییا ئەمریکا خۆ ڕادەستی دەولەتێن هەڤپەیمان کر، ئەو ژی ژناڤچوونا دەولەتێ بوو، وەلاتییێن ئەلمانیا تووشی شکەستن و نەهامەتیێت مەزن بوو، باژێر و خواندنگەهـ و نەخۆشخانە و جهێت گشتی تەختی عەردی بوون، دەولەتێن هاڤپەیمان کارگەهێت پیشەسازی و پێدڤیێن گرێدای ب ژیانا رۆژانە یا وەلاتییان ڤەگوهاستن بۆ وەلاتێن خۆ، دئەنجامدا ژێرخانا ئەلمانیا ب ئێکجاری ژناڤچوو. پشتی ڕۆخیانا ئەلمانیا ژن و زارۆك و پیرەکال مانەڤە ، پتریا گەنجێن وان دشەریدا هاتنە کوشتن و ئێخسیرکرن، ژبەر ئەڤێ چەندێ هزرا خۆ کوشتنێ دناڤ وەلاتییێن ئەلمانیا بەلاڤ بوو، پشتی ئەڤ قوناغە هاتییە دەربازکرن هزرا ڕابوون و خۆڕاگریێ دناڤ مەژیێ وان ب سەرکردایەتییا ژنکێن ئەلمانیا سەرهلدا پشتی کو حکومەتا ئەلمانیا هەلوەشیایی ، دناڤ ڕەوشەکا ئالۆز و شەپرزە گەلێ ئەلمانیا رۆژێن خۆ دەربازکرن.
سەرباری ڕەوشا دژوار و نالەبار ژن و پیرەکالا جاددە و و کولانێن باژێرێت خۆ ژبەر مایکێت شەری پاقژکرن ، پەرتۆکێن خواندنگەهان کومکرن بۆ ڤەکرنا خواندنگەهان، ژلایەکێ دیڤە هندەک دروشمێت ڤەگەراندنا هیڤییان ل سەر دیوارێت هەرفتی هاتنە نڤیسین وەکو ( ل دویف مافێ خۆ نەگەرە ، هەر کارەک دشیاندابیت پێخەت ئاڤاکرنا ئەلمانیا ئەنجامبدە ، هیڤیا سەرکەفتنێ دناڤ دل و دەرونێ هەژاران بەلاڤ بکە ، بۆ پێشڤەچوونێ خۆ ئامادەبکە) .
بێگومان دناڤبەرا سالێت 1945- 1955 قوناغا ئاڤاکرنا ئەلمانیا دەستپێکر ، وەلاتییێن ئەلمانیا ب هێز و باوەریا خۆ رۆژێن بێهنڤەدانێ هەلوەشاندن، دەمژمێرەکا زێدە یا کارکرنێ دێ گەشپێدانێ لەزتر لێکەت . ل سالا 1954 ئەلمانیا جاما جیهانێ یا تەپاپــێ بدەستڤەئینا ، دەمێ یاریکەرێت ئەلمانیا دناڤ گوڕەپانێ یاری دگەل هەڤڕکێ خۆ دکرن پێلاڤێت وان ژبەر کەڤناتیێ و دڕیانێ ژ پێت وان بوو ، لەوا یاریکەرێت هەڤڕک کەنیا وان ب یاریکەرێت ئەلمانیا دهات . دیسان دناڤبەرا سالێن 1955-1965 قوناغا دووێ یائاڤاکرنا کارگەهێت جۆراو جۆر دەستپێکر ، ژبۆ ڤێ مەرەمێ هندەک بسپۆر و شارەزایێت تورک ئینان بۆ ئاڤاکرنێ . ل ژێر دروشمێ یــێ ڕژدبــە بۆ گەهشتنا هیڤــی و ئومێـدان .
دناڤبەرا سالێن 1965- 1975 کەسانێت بازرگان و سەرمایەدار پەیدابوون ، ئەرکێ هەر بازرگانەکی بوو (50) کور و (50) کچان خولێت مەشق و ڕاهێنانان بۆ ڤەکەن لدۆر چەوانیا خزمەتکرنێ و ڤیانا وەلاتێ ئالمانیا مینا ئەرکەکێ نیشتیمانی ، ئەرکێ هەمیان ئەو بوو هیڤیێن سەرکەفتنێ دناڤ دلێت بریندار بچینن بۆ وەرارو گەشەپێدانێ و هەبوونا وان دناڤ گەلێت جیهانێ یێت پێشکەفتی .
ئەرێ بوچی ئەم وانەیان ژگەلێن زیندی بۆ پێشکەفتنا وەلاتێ خۆ وەرناگرین کو چەوا ئەم هەمی حەز ل وەلاتێ خۆ بکەین ، هەتا کەنگی دێ مینین وەک گەلێن نەزان و پاشکەفتی .
ئەو گەلێ پتر ژئاڤاکرنێ خراب دکەت ، گەلەک دنڤیت و کێم یێ هشیارە ، حەز ل خۆشیان دکەت بەری ئەو هزرا ئاڤاکرنا خۆشیان بکەت …
ئەرێ دێ کەنگی هشیاربین !؟
