سوودانی کار بۆ هەموارکرنا دەستوورێ عیراقێ دکەت

سەرۆک وەزیرێن عیراقێ دەستپێکرنا پێنگاڤان بۆ هەموارکرنا دەستوورێ عیرا`ێ دەستپێکر و ڕاگەهاند، ئەڤ پێنگاڤە وەک پشتەڤانییا کابینەیا وی یە بۆ داخوازیەکا ڕایا گشتی کو داخوازا هەموارکرنا دەستووری دکەن.

ئەڤرۆ ئێک شەمبی 29 کانوونا دووێ 2023 د ڕاگەهاندنەکێ دا، نڤیسینگەها ڕاگەهاندنا محەمەد شیاع سوودانی، سەرۆکوەزیرێن عیراقێ دیارکر، وەک پێگیربوون بۆ بجهئینانا پشکەک ژ ناڤەرۆکا کارناما وەزاری یا کابینەیا وی کو ل 27 چریا ئێکێ 2022 ل جڤاتا نوونەرێن عیراقێ هاتیە پەسەندکرن، پێنگاڤێن هەموارکرنا دەستوورێ عیراقێ دێ دەستپێکەن.

نڤیسینگەها ڕاگەهاندنا سەرۆکوەزیرێن عیراقێ ئاماژە کریە، ئەڤ پێنگاڤە بزاڤەکە ژی بۆ دیرکەفتنێ ژ حالەتێ ژ کارئیخستنا سیاسی کو د چەند قوناغێن جودا دا ب تایبەت پشتی هەلبژارتنێن بووری یێن جڤاتا نوونەرێن عیراقێ روودای.

هەر وەسا د ڕاگەهاندنێ دا هاتیە، پرسا هەموارکرنا دەستووری دگەل سەرۆکایەتییان و هەردوو دەستهەلاتێن تەشریعی و دادوەری دێ هێتە گوتوبێژکرن ژ پێخەمەت دارشتنا نەخشەڕێیەکێ بۆ هەموارکرنا دەستووری ل گۆر یا پێدڤی.

ژ لایێ خۆڤە، محەممەد شیاع سوودانی، حەسەن نیعمەت یاسریی وەک شیرەتکارێ سەرۆکێ جڤاتا وەزیران بۆ کاروبارێن دەستووری ڕاسپاردیە بۆ ب ستۆیێ خۆڤە گرتن و رێكخستنا كاروبارێن وێ پرسێ.

رۆژا پێنج شەمبی 27 چریا ئێکێ 2022، ب ئامادەبوونا 253 پەرلەمانتاران، جڤاتا نوونەرێن عیراقێ باوەری دا کابینەیا محەمەد شیاع سوودانی و پاشی ل ڕۆژا ژ لایێ لەتیف ڕەشید، سەرۆک کۆمارێ عیراقێ ڤە بۆ پێکئینانا حکومەتا نوو هاتە ڕاسپاردن.