شانده‌كێ رێكخراوا (تسیات) ژ ئه‌نقه‌ره‌ و مێرسینێ و ئه‌ده‌نا و نسێبینێ پشكداری د به‌هییا هه‌ر پێنج قوربانیێن مێردینێ دا كر

ئه‌ڤرۆ ئیكشه‌مبی” ٢٠٢٣/١/٢٩ ێ” شانده‌كێ رێكخراوا تسیات ب سه‌رۆكاتییا ” محه‌مه‌د سالح ” سه‌ره‌دانا پارێزگه‌هێ كر و ژلایێ ” ماجد سه‌ید سالح ” نوونه‌رێ پارێزگارێ دهۆكێ و ” جه‌هوه‌ر عه‌لی ” قایمقامێ قه‌زا دهوكێ هاتنه‌ پێشوازی كرن” د روونشتنه‌كێدا نوونه‌رێ پارێزگاری بناڤێ پارێزگارێ دهۆكێ بخێرهاتنا شاندێ ناڤبری كر و هه‌ردو لایان ب درێژی به‌حسێ روودانا شه‌هیدكرنا پێنج وه‌لاتیێن پارێزگه‌ها دهۆكێ ئه‌وا ل ناڤبه‌را مێردینێ و مێرسینێ دا دووڤچون و بزاڤێن هه‌ردو حكومه‌تێن هه‌رێما كوردستانێ و حكومه‌ت و سازیێن یاسایی یێن وه‌لاتێ توركیا كر.

نوونه‌رێ پارێزگارێ دهۆكێ و قایمقامێ قه‌زا دهۆكێ دگه‌ل شاندێ ناڤبری بۆ بشكداریێ د به‌هییێ دا سه‌ره‌دانا مالباتێن قوربانیان كر و شاندێ ناڤبری گۆت هه‌تا نوكه‌ حكومه‌تا توركیا زور ب جددی كار لسه‌ر وێ روودانێ دكه‌ت و حه‌فت تۆمه‌تبار هاتینه‌ ده‌سته‌سه‌ر كرن و ١٧ پارێزه‌ر ب خوبه‌خشانه‌ ل سه‌ر وێ روودانێ كار دكه‌ن” ئه‌م وه‌كه‌ رێكخراو ژی پشكدارین د هه‌موو هه‌ڤكاریان دا بۆ ئاشكراكرنا هوكارێن وێ تاوانا مه‌زن و دا دیار كرن هه‌موو خه‌لكێ توركیا و باكورێ كوردستانێ زور دلگران بووینه‌ ب وێ روودانێ و قوربانیێن روودانێ خوشك و برایێن مه‌نه‌.

ژلایێ خوه‌ڤه‌ مالباتێن قوربانیان گۆت: سه‌ره‌رایی كو ئه‌م د ئاگه‌هدارین حكومه‌تامه‌ یا هه‌رێما كوردستانێ و ئیدارا پارێزگه‌ها دهۆكێ به‌رده‌وام هه‌ڤخه‌مێن مه‌نه‌ و دووڤچوونا هوكار و ئاشكراكرنا وێ روودانێ دكه‌ن” به‌لێ ئه‌م دخوازین حكومه‌تا توركیا ژی ب زوترین ده‌م و ب روون و ئاشكرایی هوكارێن وێ روودانێ دیار بكه‌ت و سزایێن دژوار بۆ تاوانباران ده‌ربكه‌ت.