وەزیرێ دارایی و ئابووری یێ هەرێما کوردستانێ د چوارچووڤێ کۆمبوونەکێ دا دگەل شاندەکێ وەزارەتا پێشمەرگەی دوپاتکر کو پشتەڤانییێ ل ڕێکخستنا هێزێن پێشمەرگەی و چاکسازییێن وەزارەتێ دکەت.
ئەڤرۆ ئێک شەمبی 29 کانوونا ئێکێ 2023 ئاوات شێخ جەناب، وەزیرێ دارایی و ئابووری ل دیوانا وەزارەتێ پێشوازی ل وەفدەکێ وەزارەتا پێشمەرگەی یا هەرێمێ کر کو پێکهاتبوون ژ سەربەست لەزگین، بریکارێ وەزارەتێ و فەریق ڕوکن عیسا عوزێر، سەرۆکێ ئەرکان و ژمارەیەکا ئەفسەرێن بلند ل وەزارەتێ.
دەربارەی ناڤەرۆکا کۆمبوونێ، وەزارەتا دارایی و ئابووری یا هەرێما کوردستانێ ڕاگەهاند: “ئاوات شێخ جەناب سەرەڕای بخێرهاتنا شاندێ مێهڤان پشتەڤانییا خۆ بۆ ڕێکخستنا هێزێن پێشمەرگەی د چوارچووڤێ ئێک هێزا نیشتیمانی لبن سیبەرا حکومەتا هەرێما کوردستانێ و چاکسازییێن وەزارەتێ دوپاتکر و سوزا کارئاسانی و هاریکارییا تمام دا شاندی بۆ دەربازکرنا کارێن وان هندی کو پەیوەندی ب وەزارەتا دارایی ڤە هەبیت.
ڕاگەهاند ژی: ژ لایێ خۆڤە وەفدێ مێهڤان سوپاسییا پشتەڤانی و کارئاسانییا وەزیرێ دارایی کر کو د دەمێ بووری دا خەمخور و دلسوزێ وەزارەتا پێشمەرگەی بوویە د دەربازکرنا کار و بجهئینانا داخوازییێن وان دا.
وەزارەتا دارایی ئاماژە کریە ژی، ل دوماهییا کۆمبوونێ ژمارەیەکا داخوازی و پێدڤییێن هێزێن پێشمەرگەی دگەل وەزیرێ دارایی هاتنە باسکرن کو پێکهاتبوون ژ دروستکرنا ئاڤاهی و پێدڤییێن بنگەهــ و بارەگایێن مەشق و ڕاهێنانێن دوو فرقەیێن کو دێ ژ نوو هێنە ڤەگوهاستن کو د نوکە دا ل ژێر چاڤدێری و سەرپەرشتییا هێزێن هەڤپەیمانان دا د قوناغا مەشق و ڕاهێنانێ دانە، ئەڤە ژی د چوارچووڤێ هێزەکا نیشتیمانی ل بن سەرپەرشتییا وەزارەتا پێشمەرگەی دا.
