دهۆك.. 104 كوگه‌هێن هه‌لگرتنا به‌رهه‌مێ خۆمالى دێ هێنه‌ درووستكرن

ئاشتى قاسم، ئاژانسا خانى:

رێڤه‌به‌رێ گشتییێ چاندنێ ل پارێزگه‌ها دهۆكێ راگه‌هاند، كابینه‌یا نه‌هێ یا حكومه‌تا هه‌رێما كوردستانێ گرنگییه‌كا مه‌زن ب به‌رهه‌مێ خۆمالى یێ جووتیارێن كورد و درووستكرنا كوگه‌هان بۆ هه‌لگرتنا به‌رهه‌مێن وان دده‌ت و دبێژیت: حكومه‌ت هه‌موو ئاسانكارییان بۆ درووستكرنا كوگه‌هێن هه‌لگرتنا به‌رهه‌مێ وه‌لاتییان دكه‌ت.

ئه‌حمه‌د جه‌میل رێڤه‌به‌رێ گشتییێ چاندنێ ل پارێزگه‌ها دهۆكێ بۆ ئاژانسا خانى دیاركر، ل سنوورێ پارێزگه‌ها دهۆكێ 52 كوگه‌هێن هه‌لگرتنا به‌رهه‌مێ جووتیاران هاتینه‌ درووستكرن، و ره‌زامه‌ندى ل سه‌ر موله‌تا درووستكرنا ژماره‌یه‌كا كوگه‌هێن دی ژى هاتییه‌ دان كو سه‌رجه‌م دێ بیته‌ 104 كوگه‌هێن هه‌لگرتنا به‌رهه‌مێ ناڤخۆ و هه‌موو دێ ل شێخان، به‌رده‌رش و سێمێلێ بن، ئه‌ڤه‌ بۆ هندێیه‌ كو به‌رهه‌م ل ده‌مێ پێگه‌هشتنێ هه‌موو ب ئێكجارى نه‌چیته‌ دبازاریدا و هنده‌ك به‌رهه‌م بۆ وه‌رزه‌كێ دى بهێته‌ هه‌لگرتن و جووتیار بشێن مفاى ژ به‌رهه‌مێن خوه‌ ببینن و قووناغ ب قووناغ بێخنه‌ دبازاریدا.

زێده‌تر رێڤه‌به‌رێ گشتییێ چاندنێ ل پارێزگه‌ها دهۆكێ ئاشكراكر، دهۆك دێ بیته‌ ئێكه‌م پارێزگه‌هـ ل سه‌ر ئاستێ هه‌رێما كوردستان و عیراقێ بۆ كوگه‌هكرنا به‌رهه‌مێ ناڤخۆ یێ جووتیاران، ب ڤێ چه‌ندێ جووتیار دێ مفاى ژ به‌رهه‌مێن خوه‌ وه‌رگرن، ژبه‌ركو ده‌مێ هه‌موو به‌رهه‌م نه‌چیته‌ بازارى و پشكه‌ك بهێته‌ هه‌لگرتن، بهایێ وى ناشكێت و دێ بیته‌ رێكه‌ك بۆ بلندكرنا ئاستێ بازارێ به‌رهه‌مێ خۆمالى بۆ جووتیاران.