د. خه‌لیل غازى : من نه‌گوتییه‌ دبیت بهایێ 100 دۆلارێن ئه‌مریكى بگه‌هیته‌ 500 هزار دینارێن عیراقى

ئه‌ندامه‌كێ لژنه‌یا دارایى ل په‌رله‌مانێ عیراقێ ره‌تكر كو وى د داخویانییێن خوه‌دا دیاركربیت، ره‌نگه‌ بهایێ 100 دۆلارێن ئه‌مریكى بگه‌هیته‌ 500 هزار دینارێن عیراقى.

د. خه‌لیل غازى ئه‌ندامێ لژنه‌یا دارایى ل په‌رله‌مانێ عیراقێ بۆ ئاژانسا خانى دیاركر، عیراق ل سه‌ر بزاڤێن خوه‌ بۆ ڤه‌گه‌راندنا بهایێ دینارى یا به‌رده‌وامه‌، لێ پێنگاڤێن وێ لسه‌ر خۆنه‌ و ڤه‌گه‌راندنا دۆلارى بۆ بهایێ وى یێ به‌رى نوكه‌ دێ پێدڤى ب ده‌مى بیت.

زێده‌تر د. خه‌لیل غازى ئاشكراكر، شانده‌كێ عیراقێ دێ سه‌ره‌دا ئه‌مریكا كه‌ت و شانده‌كێ دى دێ چیته‌ توركیا، و عیراقێ دڤێت ئه‌و رێنمایێن ئه‌مریكا د سیسته‌مێ نوو یێ جیهانیدا داناین چه‌نده‌كێ ل سه‌ر عیراقێ كێمبكه‌ت، داكو بانكا ناڤه‌ندى بشێت زێده‌تر دۆلارى بێخیته‌ دبازاریدا، هه‌روه‌سا گوت: ئه‌گه‌رێ بلندبوونا دۆلارى دنوكه‌دا بۆ هندێ ڤه‌دگه‌ریت كو بازرگان دۆلارى ژ بازارى دكرن و دۆلار دبازاریدا نه‌هێلایه‌، و ئه‌و ئێك ژ ئه‌گه‌رانه‌ بهایێ دینارێ عیراقى به‌رامبه‌ر دۆلارێ ئه‌مریكى كێمببیت.

ل دۆر وێ داخویانییا د. خه‌لیل غازى یا كو ل هنده‌ك جهان به‌لاڤبووی، كو دبێژیت، ئه‌گه‌ر عیراق پێگیرییێ ب رێنمایێن ئه‌مریكا نه‌كه‌ت، دبیت بهایێ 100 دۆلارێن ئه‌مریكى بگه‌هیته‌ 500 هزار دینارێن عیراقى، ناڤبرى گوت: چ راستى بۆ ڤێ چه‌ندێن نینه‌ و وى ل چ جهان نه‌گوتییه‌ كو دبیت بهایێ دۆلارى بگه‌هیته‌ ڤى ئاستى.