ئه‌ڤرۆ وه‌زیرێ ده‌رڤه‌ یێ رووسیا دێ گه‌هیته‌ به‌غدا

په‌یڤدارێ وه‌زاره‌تا ده‌رڤه‌ یا عیراقێ ئاشكراكر، ئه‌ڤرۆ سێرگى لاڤرۆڤ وه‌زیرێ ده‌رڤه‌ یێ رووسیا دێ گه‌هیته‌ به‌غدا و چه‌ندین كۆمبوونان دگه‌ل به‌رپرسێن عیراقێ كه‌ت.

ئه‌حمه‌د سه‌حاف په‌یڤدارێ وه‌زاره‌تا ده‌رڤه‌ یا عیراقێ راگه‌هاند، ئه‌ڤرۆ وه‌زیرێ ده‌رڤه‌ یێ رووسیا سێرگى لاڤرۆڤ دێ سه‌ره‌دانا به‌غدا كه‌ت و زنجیره‌یه‌كا دیدار و كۆمبوونان دگه‌ل هژماره‌كا مه‌زن یا به‌رپرسێن عیراقێ كه‌ت، و ئاماژه‌ ب هندێ دا، شانده‌كێ بلند یێ حكومه‌تی رووسیا و ژماره‌كا كۆمپانییێن بوارێ وه‌به‌رهێنان و نه‌فت و غازێ دێ دگه‌ل سێرگى لاڤرۆڤى سه‌ره‌دانا به‌غدا كه‌ن.

ناڤبرى ئه‌وژى دیاركر، دكۆمبوونا دناڤبه‌را وه‌زیرێ ده‌رڤه‌ یێ رووسیا و به‌رپرسێن بلندێن عیراقێ دا، دێ به‌حسا موكۆمكرنا په‌یوه‌ندییێن دناڤبه‌را هه‌ردوو وه‌لاتاندا هێته‌كرن.

میدیا یا عیراقێ به‌لاڤكرییه‌، چاڤه‌رێ دهێته‌كرن وه‌زیرێ ده‌رڤه‌ یێ رووسیا سێرگى لاڤرۆڤ پشتى به‌غدا، سه‌ره‌دانا هه‌ولێرێ ژى بكه‌ت.