کۆمپانییا دانەگاز یا ئیماراتی بەڵاڤکرییە، ل ساڵا 2022 ێ نێزیکی 300 ملیۆن دۆلارێن شایستهیێن دارایی ل مسرێ و هەرێما کوردستانێ گەهشتینە دەستێ وان.
کۆمپانییا دانەگاز د ڕاگەهاندنەکێ دا دیارکرییە، ل سالا بوری ل هەر ئێک ژ وەلاتێ مسرێ و هەرێما کوردستانێ ب بهایێ 318 ملیۆن دۆلاران شایستەیێن دارایی گەهشتینە دەستێ وان، ژ وی کوژمەیی ژی 64 ملیۆن دۆلار ژ هەرێما کوردستانێ بوون و 254 ملیۆن دۆلار ژی ل مسرێ بوون.
کۆمپانییێ ئاماژە کریە ژی، شایستەیێن دارایی ل سەر بنەمایێ دەستکەڤتێ سالانە ل هەرێما کوردستانێ زێدەکرییە.
پاتریک ئالمان- وارد، ڕێڤەبهرێ بجهئینانێ یێ کۆمپانییا ناڤهاتی ڕاگەهاند:”سەرکەڤتنا مە د تهمامکرنا پڕۆژەیی دا ل هەرێما کوردستانێ و پلانێن مە بۆ زێدەکرنا بەرهەمئینانێ ل مسرێ، دێ کارتێکرنا ئەرێنی ل سەر ژینگەهێ هەبیت، چونکی بەرهەمئینانا گازێ، دەرکرنا کاربۆنێ چڕ بۆ بەرهەمئینانا کارەبێ ناهێلیت، ئەڤەژی دێ بیتە ئەگەرێ بلندکرنا کۆالێتییا ژیانا ئاکنجییێن کوردستانێ و مسرێ.”
کۆمپانییا ئیماراتی پێشتر د ڕاگەهاندنەکێ دا ل مەها شەش یا سالا بوری دیارکربوو، ل هەرێما کوردستانێ باشبوونەکا بەرچاڤ د وەرگرتنا شایستەیێن خۆدا دبینن.
دانەگاز ئێکەم و مەزنترین کۆمپانییا بەرهەمئینانا گازا سرووشتیە ل ڕۆژهەلاتا ناڤین و ل سالا 2005 ێ هاتییە دامەزراندن و ل بازاڕێ ئەبوزەبی ناڤێ وێ هاتییە تۆمارکرن.
