ب هه‌لكه‌فتا دامه‌زراندنا ئێكه‌تیا نڤیسه‌رێن كورد، سه‌رۆكێ هه‌رێما كوردستانێ پیرۆزباهى ل هه‌مى نڤیسه‌ر و ئه‌دیبێن كوردستانێ كر.
ئه‌ڤرۆ مالپه‌رێ سه‌رۆكاتیا هه‌رێما كوردستانێ راگه‌هاندنه‌ك به‌لاڤكر و تێدا هاتییه، ب هه‌لكه‌فتا پێنجى و سێ سالیا دامه‌زراندنا ئێكه‌تیا نڤیسه‌رێن كورد، نێچیرڤان بارزانى سه‌رۆكێ هه‌رێما كوردستانێ پیرۆزباهیێن گه‌رم ئاراسته‌ى مه‌لبه‌ندێ گشتى و هه‌مى نڤیسه‌ر و ئه‌دیبێن كوردستانێ كر و داخازا سه‌ركه‌فتنێ بۆ خواست.
هه‌روه‌سا نێچیرڤان بارزانى ب ڤێ هه‌لكه‌فتێ دبێژیت: ل ڤێ بیره‌وه‌ریێ ب رێز و ته‌قدیرڤه، به‌رێ خۆ دده‌ینه خه‌بات و زه‌حمه‌تا مه‌زن یا ئێكه‌تیا نڤیسه‌رێن كورد، و خزمه‌تا وان یا دیار و به‌رچاڤ ژبۆ زمان و كولتوورێ كورد و هه‌لویستێ نه‌ته‌وه‌یى و نیشتیمانى ل سه‌رده‌مێ پێشمه‌گایه‌تی و بزاڤێن گه‌لێ كورد بۆ ئازادیێ بلند رادگرین.
هه‌روه‌سا گوتژى: دڤێ بیره‌وه‌ریێدا دوپاتیێ ل گرنگى و ئاماده‌یا رۆلێ كاریگه‌ر یێ نڤیسه‌ران دكه‌ین ژ پێناڤ گرنگیدان ب گیانێ نیشتیمانپه‌روه‌رى و و بهایێن مرۆڤایه‌تى، دانانا كۆمه‌لگه‌هه‌كا پێشكه‌فتى، پێشئێخستنا زمان و ئه‌ده‌بیات، پاراستنا ناسنامه و كولتوورێ كورد و بهێزكرنا ئێكودو قه‌بویلكرنێ و پێكڤه‌ژیان و لێبوورینێ.
سه‌رۆكێ هه‌رێكا كوردستانێ، سلاڤان بۆ گیانێ پاكێ شه‌هیدێن كوردستانێ دهنێریت، ژ پێناڤ ئازادیا گه‌ل و وه‌لاتێ خودا گیانێ خۆ كریه قوربانى و گوت: بۆ وان هه‌میێن ته‌مه‌نێ خۆ ب نڤیسین و داهێنان و خزمه‌تا زمان و ئه‌ده‌بیاتێن كوردى دانایى. بیره‌وه‌ریێن هه‌وه هه‌می ده‌مان ب خێر و سلاڤ ژ مالباتێن هه‌وه یێن سه‌ربلند.
