جوتیار عادل: گوتوبێژێن مە دگەل بەغدا دێ د بەردەوامبن تا دگەهینە ڕێککەفتنێ

پەیڤدارێ حکومەتا هەرێما کوردستانێ ڕاگەهاند، شاندێ حکومەتا هەرێما کوردستانێ ل بەغدا چەند کۆمبوونێن گرنگ ئەنجامداینە و چاڤەڕێ دکەن ل سەر وان خالێن هەولێر و بەغدا ناکوکی ل سەر هەین، بگەهنە لێکتێگەهشتنەکا هەڤپشک.

 ئەڤرۆ دووشه‌مبی 13 شوباتا 2023، جوتیار عادل، بۆ سایتێ فەرمی یێ حکومەتا هه‌رێما كوردستانێ ڕاگەهاند، “دوهی و ئەڤرۆ شاندێ حکومەتا هەرێما کوردستانێ، سێ کۆمبوونێن گرنگ ئەنجامدان، کۆمبوونا ئیکێ دگەل وەزارەتا نەفتا عیراقی بوو و تێدا باس ل بنەمایێن سەرەکی یێن یاسایا نەفت و غازێ هاتە کرن و شاندێ حکومەتا هەرێمێ دیتنا هەرێما کوردستانێ دەربارەی پڕۆژە یاسایێ بەرچاڤکر و پاشی گوتوبێژ دەربارەی بنەمایێن سەرەکی کرن، ژ بۆ هندێ د یاسایا نەفتا فیدڕالی دا بهێنە بنەجهکرن.”

پەیڤدارێ حکومەتا هەرێما کوردستانێ ڕاگەهاند ژی:ئەڤرۆ ژی شاندێ حکومەتا هەرێما کوردستانێ کۆمبوون دگەل لایەنێن پەیوەندیدار هەبوو بۆ دارشتنا دوماهی خالێن بودجەیا عیراقا فیدڕال بۆ سالا 2023 و گوتوبێژ ل سەر تەوەرێن سەرەکی هاتە کرن و لێکتێگەهشتنا باش ژی هەبوو، پاشی پاشی گوتوبێژ ل سەر وان خالان هاتنە کرن  کو پێدڤی بوو د بودجەیێ دا بهێنە جێگیرکرن.” هەر وەسا جوتیار عادل ئاماژەکر،”هەر ئەڤرۆ شاندێ حکومەتا هەرێما کوردستانێ سەرەدانا دەرگەهێن سنووری یێن عیراقێ کر بۆ باسکرنێ ل سەر بلندکرنا ئاستێ هەماهەنگییێ دناڤبەرا هەردوو لایان دا دەربارەی شروڤەکارییا گومرکی و هەماهەنگییا باشتر دناڤبەرا هەردوو لایان دا.

دەربارەی ئەنجامێ کۆمبوونان، پەیڤدارێ حكومه‌تا هه‌رێما كوردستانێ کو ئەو بخۆ ژی ئەندامێ شاندێ حکومەتا هەرێمێ یە ل بەغدا دیارکر، کۆمبوونان ئەنجامێن باش هەبووینە، بەلێ” دیسان هێشتا چاڤەڕێێینە کو ئەو خالێن کو هێشتا نکوکی ل سەر، گوتوبێژان ل سەر بکەین و بگەهینە لێکتێگەهشتنا هەڤپشک.”

ژ لایێ خۆڤە، ئومێد سه‌باح، سه‌رۆكێ دیوانا جڤاتا وه‌زیرێن هه‌رێما كوردستانێ و ئه‌ندامێ شاندێ حكومه‌تا هه‌رێمێ ڕاگەهاند، “پشتی سەرەدانکا دوو رۆژی بۆ بەغدا و ئەنجامدانا چەندین دیدار و کۆمبوونان دگەل حکومەتا فیدڕاڵ وەک شاندێ حکومەتا هەرێما کوردستانێ، ڤەگەڕیاینەر هەولێرێ و بڕیارە حەفتیا بهێت دووبارە بچینە بەغدا بۆ درێژە پێدانا گوتوبێژان.”