سوودانی ژمارەیەکا بڕیارێن بلەز دەربارەی شنگالێ دەردکەت

محەمه‌د شیاع سوودانی، سه‌رۆكوه‌زیرێن عیراقێ ژماره‌یه‌كا بڕیارێن بلەز دەرباره‌ی ئاڤەدانکرنا شنگالێ و هاریکاریکرنا ئاواره‌یان ده‌ردکەت.

ل گۆرەی نووچەیەکێ ئاژانسا فەرمی یا عیراقێ، محەمه‌د شیاع سوودانی دوپاتی ل ‌سه‌ر پێدڤییا دابینكرنا خزمه‌تگوزارییان بۆ قه‌زایا شنگالێ كردیە، ئەڤەژی وه‌ک ئاماده‌كارییه‌ك بۆ ڤەگەڕیانا ئاوارەیا.

هەڤدەم دوپاتی ل‌ رژدبوونا حكومه‌تا خۆ بۆ ڤەگەڕاندنا ئاواره‌یان بۆ شنگالێ و ئاسایکرنا ڕەوشا ئەمنی کریە.

دهێتە زانین، رۆژا 3 ئاب 2014، تیرۆرستێن داعش هێرشکرە سەر شنگالێ و جینوسایدا ئێزدییان ل شنگال و دەڤەرێ ئەنجامدا.

د وێ هێرشی دا، تیرۆرستێن داعش زێدەتری 6 هزار و 500 ئافره‌ت و زارۆکێن ئێزدییان رەڤاندن و زێدەتر ژ 350 هزار كه‌سێن دی ژی ئاوارەی کەمپێن دەڤەرێن هەرێما کوردستانێ بوون، هەر وەسا نێزیکی دوو هزار و 500 ئێزدییان ژی تا نوکە د بێسەروشوینن.
رۆژا 13 چریا دووێ 2015، د ئۆپەڕاسیۆنەکا هێزێن پێشمه‌رگه‌ی دا ب سه‌رپه‌رشتییا سه‌رۆك بارزانی، شنگال ژ دەستێن تیرۆرستێن داعش هاتە ڕزگارکرن.

ل 9 چریا ئێکێ 2020، ڕێککەفتنناما شنگالێ دناڤبەرا هەردوو حکومەتێن هەرێما کوردستانێ و عیراقێ دا ل باژێرێ بەغدا هاتە ئیمزاکرن.