ئەحمەد گەرمیانی، سەرۆكێ ئێکەتییا مامۆستاییێن كوردستانێ بۆ ئاژانسا خانی ڕاگەهاند، كۆمپانیا باجگر رێككەفتنەك دگەل ئێکەتییا مامۆستاییێن كوردستانێ کرییە، كو بۆ دەمێ سێ هەیڤان ترۆمبێلێن ژ جۆرێ جیلی كو ب كۆژمێ 800 هەتا هزار دۆلاران ب ئەرزانتر و ب شێوەیێ قست بدەنە مامۆستایان.
ئەحمەد گەرمیانی گۆت،” هەمی كەس دشێن ب بھایێ 10 هزار دۆلاران ب قەر ترۆمبێلان ببەن، بەلێ مامۆستا دشێن ب بھایێ 20 هزار دۆلاران ب قەر ببەن، هەروەسا بۆ وەلاتییێن ئاسایی سێ سال گەرەنتی هەیە بەلێ بۆ مامۆستایان پێنج سالن.”
سەرۆكێ ئێکەتییا مامۆستایان دیاركر، ئەڤ قستە بۆ وان مامۆستایانە یێن مووچەیێ وان ژ ملیۆنەکێ كێمتر نەبن و دوو مامۆستا کەفیل بن، د ئەڤێ قوناغێدا زێدەتر دێ وان مامۆستایان ڤەگریت یێن گەلەك خزمەت هەین و هەتا نوكە ژی ترۆمبێل نەبن، هەروەسا ل دەسپێكێ دێ ل پارێزگەهێن دھۆك، ھەولێر و سلێمانییێ ڤەگریت.
ئەحمەد گەرمیانی، سەرۆكێ ئێکەتییا مامۆستایان دووپاتكر، د بەرنامەیێ مە دا هەیە ل داهاتیدا ترۆمبێلێن كۆمپانیا تۆیۆتا ژی ب قست بدەینە مامۆستایان.
