ناڤەرۆکا کۆمبوونا مەسرور بارزانی و سەرۆکێ جڤاتا پیران یا فەڕەنسا هاتە ڕاگەهاندن

مەسرور بارزانی، سەرۆکوەزیرێن حکومەتا هەرێما کوردستانێ د چوارچوڤێ سەرەدانا خۆدا بۆ فەرەنسا، دگەل ژیرار لارشێ سه‌رۆكێ جڤاتا پیران یا فەرەنسا (سێنات) کۆمبوو.

حکومەتا هەرێما کوردستانێ رایگەهاند، د کۆمبوونێ دا گوتوبێژ دەربارەی ڕەوشا گشتی یا عیراقی و دەڤەرێ و پێدڤییا چارەسەرکرنا ئاریشەییێن دناڤبەرا هەرێما کوردستانێ و حکومەتا فیدڕال دا هاتنە کرن ل سەر بنەمایێ دەستووری.

د وێ دیدارێ دا، سەرۆکێ جڤاتا پیران یا فەرەنسا، ب ڕیز و پێزانینڤە ئاماژە ب خەبات و قوربانیدانێن پێشمەرگەیێ کوردستانێ کر، ب تایبەت د ژناڤبرنا تیرۆرستێن داعش و پاراستنا پێکهاتێن جێواز یێن هەرێما کوردستانێ دا.

سەرەڕای سوپاسیکرنا حکومەتێ و گەلی فەرەنسا بۆ پشتەڤانیکرنا خەلکێ کوردستانێ، سەرۆکێ حکومەتێ، کورتەیەک دەربارەی چاکسازییێن کابینەیا نەهێ یا حکومەتا هەرێما کوردستانێ بەرچاڤکر.

دیارکر ژی، گرنگیا بجهئینانا ڕێککەفتنناما شنگالێ و ئاسایکرنا ڕەوشا دەڤەرا شنگالێ ڕێخۆشکەرە بۆ ڤەگەریانا ئاوارەیان بۆ جهێن خۆ، ئەڤ پرسە پشکەکا دی یا گوتوبێژێن کۆمبوونا هەردوو لایان بوون.