پەیاما سەرۆك بارزانی بۆ وەغەرکرنا حەمید ئەفەندی

پەیاما سەرۆك بارزانی بۆ وەغەرکرنا تێكۆشەرێ دیارێ کوردستانێ حەمید ئەفەندی

ب ناڤێ خودێ یێ مەزن و دلۆڤان

ب خەمەکا گرانڤە ئێڤارییا ڕۆژا ئەینی 17ی شوباتا 2023 پێشمەرگە و فەرماندەیێ ماندی نەناس و تێكۆشەر و خەباتکەر و نیشتیمانپەروەرێ گەلێ مە حەمید ئەفەندی وەغەرا دووماهییێ كر.

حەمید ئەفەندی د قۆناغێن جودایێن بەرخودان و خەباتا گەلێ مە و پارتییا دیموكراتا كوردستانێ و د شۆڕشا ئەیلوول و شۆڕشا گوڵان و سەرهلدان و هەروەسا د قۆناغا پشتی سەرهلدانێ و شەڕێ ڕزگارکرنا عێراقێ و شەڕێ دژی تیرۆریستێن داعشێدا پێشمەرگە و فەرماندەیەکێ ئازا و بەرگریكارەکێ سەرسەختێ بەها و ئارمانجێن گەلێ كوردستانێ بوو.
حەمید ئەفەندی ژییێ خوە ژپێناڤ دۆزا ڕەوایا گەلێ خوە تەرخان کر و، پێشمەرگەیەکێ وەفادارێ ڕێبازا بارزانی و كوردایەتی و هەردەم جهێ باوەرییێ و پشتبەستنێ بوو.

وەغەرکرنا حەمید ئەفەندی بۆ مە هەمییان خەمەکا مەزنە، كوردستان پێشمەرگەیەكێ قەهرەمان ژ دەست دا و من ژی برا و دۆست و هەڤسەنگەر و هەڤالەکێ خۆشتڤی ژ دەستدا. سەرەخۆشییێ ل خوە و سەركردایەتی و كادیر و ئەندام و لایەنگرێن پارتی و هەڤاڵ و هەڤسەنگەر و مالباتا هێژا و کەسوکارێن خودێ ژێ ڕازی حەمید ئەفەندی و هەمی خەڵكێ كوردستانێ و پێشمەرگەیێن قەهرەمان دكەم.

ژ خودایێ مەزن دخازم گیانێ خودێ ژێ ڕازی حەمید ئەفەندی ب بەهەشتا بەرین شاد بكەت و سەبر و ئارامییێ بدەتە هەمی لایەكی.

انا للە و انا الیه راجعون

مەسعود بارزانی
17ی شوباتا 2023