حسێن كه‌لاری: ئامارێن کۆمکرنا ھاریکارییان دێ ھێنە بەلاڤکرن

ئاژانسا خانی ” تایبەت:

بڕیارە ڤێ حەفتییێ ئامارێن کۆمکرنا ھاریکارییان بۆ خەلکێ زیان ڤێکەفتییێ باکوور و رۆژئاڤایێ کوردستانێ بھێتە ئاشکرا کرن و بەرپرسەکێ وەزارەتا نافخۆ ژی ئاشکرا کر، قەبارێ کۆمکرنا ھاریکارییان زۆرە و ھەموو ژی دێ ھێنە بەلاڤکرن.

حسێن کەلاری، رێڤەبەرێ گشتی یێ ناڤەندا بەرھنگاربوونا قەیرانان بۆ ئاژانسا خانی دیار کر” دوھی ئەینییێ دووماھی ب کەمپینا کۆمکرنا ھاریکارییان بۆ زیان ڤێکەفتی یێن باکوور و رۆژئاڤایێ کوردستانێ ھاتییە و ھەر ل رۆژا دەستپێکێ ئامارێن کۆمکرنا ھاریکارییان ھاتییە کرن ژلایێ وەزارەتا نافخۆیا ھەرێما کوردستانێ و بڕیارە ڤێ حەفتییێ ب فەرمی ئامارێن کۆمکرنا ھاریکارییان بھێتە بەلاڤکرن و ھەموو ھوورکاری تێدا ھەنە لدۆر قەبارێ ھەڤکاری یێن ھەرێما کوردستانێ.

ناڤهاتی گۆت ژی” ھەتا نوکە رێژەکا زۆرا ھاریکارییان ھاتییە کۆمکرن و پشكەک ژ وان ل رۆژێن بوری ھاتینە ھنارتن بۆ باکوورێ کوردستانێ و پشكه‌ك ژی بۆ رۆژئاڤایێ کوردستانێ، ھەر چەندە جۆداھی نەھاتییە کرن دناڤبەرا زیان ڤێکەفتی یێن باکوور و رۆژئاڤا، بەلێ رێکێن گەھاندنا ھاریکارییان بۆ رۆژئاڤایێ کوردستانێ زەحمەتن و ھاریکاری یێن گەھشتینە رۆژئاڤا ژی وەک پێدڤی نەھاتینە بەلاڤکرن ل سەر کەسێن زیان ڤێکەفتی.