ب كۆمبوونا دگهل وهزیرێ دهولهتێ ل وهزارهتا ههماههنگییا ئابوورى و پێشڤهبرنا ئهلمانیا، سهرۆكێ ههرێما كوردستانێ دووماهى ب دیدار و كۆمبوونێن خوه ل میونشن ئینا.
نێچیرڤان بارزانى سهرۆكێ ههرێما كوردستانێ د دووماهى دیداردا ل كۆنفرانسێ ئاسایشا میونشن، دگهل نیێلس ئانن وهزیرێ دهولهتێ ل وهزارهتا ههماههنگییا ئابوورى و پێشڤهبرنا ئهلمانیا كۆمبوو، و هاریكارییا ئابوورى و پرۆژهیێن ئهلمانیا دبیاڤێ پێشڤهبرنێدا ل عیراق و ههرێما كوردستانێ دكۆمبوونا واندا هاتنه گوتوبێژكرن، و دووپاتى ل سهقامگێرییا سیاسى و ئابوورى ل عیراقێ هاته كرن.
ل دووڤ راگههاندنا سهرۆكایهتییا ههرێما كوردستانێ دهربارهى كۆمبوونێ، ههردوو لایان رهوشا سیاسى و ئهمنییا عیراقێ گوتوبێژكر و تیشك خسته سهر رێككهڤتنا حكومهتا ههرێما كوردستانێ و حكومهتا فیدرال یا عیراقێ بۆ ئاساییكرنا رهوشا شنگالێ.
ل دووڤ راگههاندنێ، نیێلس ئانن وهزیرێ دهولهتێ ل وهزارهتا ههماههنگییا ئابوورى و پێشڤهبرنا ئهلمانیا دووپاتكر، گرنگه رهوشا ئهمنییا شنگالێ سهقامگیر بیت، داكو ئهلمانیا بشێت هاریكارییێ بكهت و زێدهتر پرۆژهیان ل وێرێ بجهبینیت.
شهرێ دژى تیرۆرێ و بهرهنگاربوونا مهترسییێن داعشێ ب تایبهتێ ل دهڤهرێن مادهیێ ( 140 )، رهوشا سیاسییا سووریایێ و دهڤهرێ ب گشتى لایهنهكێ دییێ كۆمبوونێ بوو.
