لیوا عەبدولخالق تەلعەت: 500 ھزار کەسان ب رێیا ئونلاین ناڤێن خۆ بۆ زێرەڤانێن سنووری تۆمارکریە

بەرپرسەکێ لەشکەری یێ ھەرێما کوردستانێ دیارکر، ب سیستەمێ ئونلاین 500 ھزار کەسان ناڤێن خۆ بۆ زێرەڤانێن سنووری تۆمارکرینە ئەڤە د دەمەکی دایە ب تنێ سێ ھزار کەس دێ ھێنە دامەزراندن.
لیوا عەبدولخالق تەلعەت، نوونەرێ ھەردوو وەزارەتێن پێشمەرگە و ناڤخۆ ل بەغدا بۆ ئاژانسا خانی دیارکر،” حوکمەتا عیراقێ بڕیاردایە سێ ھزار کەسان ل ھەرێما کوردستانێ وەک زێرەڤانێن سنووری ب دامەزرینیت.”، گۆتژی:”بەری نوکە ب رێیا سیستەمێ ئونلاین گەنجێن ھەرێما کوردستانێ ناڤێن خۆ تۆمارکرینە، بەلێ بۆ دامەزراندنا سێ ھزار کەسان 500 ھزار کەسان ناڤێن خۆ تۆمارکرینە دا کو ببنە زێرەڤانێن سنووری ئەڤەژی ھژمارەکا زۆرە، ھەتا نوکە چ ئەنجام ژی بۆ دامەزراندنا زێرەڤانێن سنووری نینە.”

لیوا عەبدولخالق تەلعەت زێدەتر گۆت:” کۆمبوونێن د ناڤبەرا ھەرێمێ و بەغدا دا ژ بۆ چارەسەرکرنا پرسێن سنووری بەردەوامی ھەیە و بەری نوکە ھەماھەنگی ھاتیەکرن و پڕۆسەیا پرسێن سنووری بشێوەیەکێ باش بڕێڤەدچیت، بەلێ ھێشتا نەگەھشتیە قۆناغێن دوماھیێ و سەردانا شاندێن ھەردوولاژی د بەردەوامن.”