سێ ھزار کارمەندێن کۆمسیۆنێ دێ ھێنە دامەزراندن و 270 ژ وان بۆ پارێزگه‌ها دهۆكێ نه‌

 ئاژانسا خانی ” تایبەت:

بەرپرسەکێ کۆمسیۆنا بلندا ھەلبژارتنێن عێراقێ ئاشکرا کر، پشتی پەسەندکرنا بودجه‌یێ عێراقێ سێ ھزار کارمەندێن کۆمسیۆنێ دێ ھێنە دامەزراندن و ٢٧٠ ژ وان دێ بۆ پارێزگەھا دھۆکێ بن.

خالد دۆسکی، رێڤەبەرێ ئوفیسا کۆمسیۆنا ھەلبژارتنێن عێراقێ ل دھۆکێ بۆ ئاژانسا خانی دیار کر” سێ ھزار کارمەندێن کۆمسیۆنێ داخوازا دامەزراندنێ کرییە و ژلایێ حکومەتا عێراقێ ڤه‌ سۆز ھاتییە دان ئەو    کارمەندێن کۆمسیۆنێ بھێنە دامەزراندن و دناڤا پڕۆژە قانوونا بودجێ گشتی یێ عێراقێ ژی دامەزراندنا وان کارمەندێن کۆمسیۆنێ ھاتییە پشتڕاست کرن.

ناڤهاتی گۆت ژی” ئه‌و کارمەندێن بڕیارە بھێنە دامەزراندن ھژمارا وان سێ ھزار کارمەندن بۆ ھەموو عێراقێ، بەلێ دێ پشکا شێری بەر ب ھەرێما کوردستانێ کەڤیت و ب تنێ ل سنورێ پارێزگەھا دھۆکێ ٢٧٠ کارمەند دێ ھێنە دامەزراندن ڤێ چەندێ ژی دێ کاریگەری لسەر رێڤەچوونا کارێن کۆمسیۆنێ ھەبیت.