سیپان شێروانی: رێکكەفتن دناڤبەرا ھەرێمێ و بەغدا لدۆر پڕۆژە قانوونا بودجەیی ھاتییە کرن

ئاژانسا خانی ” تایبەت:

پەرلەمانتاره‌كێ کورد ل پەرلەمانێ عێراقێ ئاشکرا کر، پارتی و لایەنێن کوردی ل سەر بنەمایێ چەند مەرجان پشکداری د پێکئینانا حوکمەتا عێراقێ دا کرییە و بۆ جارا ئێکێ یە رێکكەفتن ب نڤێسین ھەبیت دناڤبەرا ھەرێم و بەغدا.

سیپان شێروانی، ئەندامێ لیژنا ئابوری ل پەرلەمانێ عێراقێ بۆ ئاژانسا خانی دیار کر” رێکكەفتن دناڤبەرا ھەرێم و بەغدا لدۆر پڕۆژە قانوونا بودجەیی ھاتییە کرن، چونکی بەری پێکئینانا حوکمەتا نوویا عێراقێ ھێزێن کوردی چەند مەرجەک ھەبووینە بۆ پشکداری کرنێ دناڤا حوکمەتا عێراقێ دا، بێگومان ئێک ژ وان خالێن بەری رێکكەفتن ل سەر ھاتییە کرن بابەتێ پشکا ھەرێما کوردستانێ بوویە دناڤا بودجێ عێراقێ دا.

ناڤهاتی گۆت ژی” راستە ل سالێن بوری ژی رێکكەفتن ھەبوویە دناڤبەرا ھەرێم و بەغدا دا، به‌لێ عێراق پێگیر نەبوویە ب رێکكەفتنێ، بەلێ بۆ جارا ئێکێ یە رێکكەفتنەک ب نڤێسین ھەبیت دناڤبەرا ھەرێم و بەغدا دا، ھەتا دناڤا پەرلەمانی ئێکگرتنەک ھەیە و ھەموو پەرلەمانتارێن دناڤا رێکكەفتنێ وەکو پارتی رژدن ل سەر بجهئینانا رێکكەفتنێن دھێنە کرن.