مەسرور بارزانی، سەرۆکێ حکومەتا هەرێما کوردستانێ ڕاگەهاند، سەرهلدانا پیرۆز یا سالا 1991ێ بەرهەمێ ئێكڕێزی و ئێكگرتنا هێزێن كوردستانێ و پێكهاتێن جودا یێن وەلاتییێن كوردستانێ بوو كو وەرچەرخانەكا دیرۆكی ژ خەبات و تێكۆشانا گەلێ كوردستانێ ل پێناڤ رزگاربوون ژ ستەم و بندەستی و داگیركاریێ ب دەستڤەئینانا ئازادیێ دروست كر.
مەسرور بارزانی گۆت،” سەرهلدان پەیامەكا روون و زەلال یا وەلاتییێن كوردستانێ بوو بۆ هەمی جیهانێ، كو ژێردەستی و داگیركرنێ رەتدكەین و دڤێت ب سەربلنداهی بژین. “
سەرۆکێ حکومەتا هەرێمێ دووپات ل هەلویست و تەڤاهییا وەلاتییێن نیشتیمانپەروەر یێن كوردستانێ كر بۆ داكۆكیكرن ژ دەستكەفت و مافێن دەستووری یێن گەلێ كوردستانێ، كو ب هەمی شێوەكی بەرگریێ لێ دكەین دەستان ژێ بەرنادەین و دێ بەردەوام بین ژ كاروانێ ئاڤەدانكرن و گەشەپێدانا كوردستانێ.
مەسرور بارزانی، ل دووماهیا پەیاما خۆ دا ڕاگەهاند، د 32 سالیا سەرهلدانا مەزن و پیرۆز یا گەلێ کوردستانێ ل ئادارا سالا 1991ێ، گەرمترین پیرۆزباهی ئاراستەیی گهلێ کوردستانێ و پێشمەرگەیێن قاهرەمان و خێزانێن سەربلندێن شەهیدان دكەم و سەرێ ڕێزێ بۆ شەهیدێن نەمر یێن سەرهلدانێ و هەمی شەهیدێن كوردستانێ د چەمینین.
